Куба АҚШнинг ҳарбий босқинига тайёрланмоқда
Трамп АҚШ Эрондан кейин Кубага эътибор қаратишини айтган эди.
Куба вазирлар маҳкамаси вакили, ўринбосар ташқи ишлар вазири Карлос Фернандез де Кассио ҳафта охирида мамлакат ҳарбийлари АҚШдан ҳарбий тажовуз эҳтимолига тайёрланаётганини маълум қилди.
У NBC News'нинг “Мeet the Press” дастурига берган интервьюсида, Куба раҳбарлари дунёдаги вазиятни инобатга олган ҳолда мумкин бўлган можаро эҳтимолини инкор этиш “аҳмоқлик” бўлишини таъкидлади.
Фернандез де Кассио сўзларига кўра, Куба раҳбарлари ушбу можаронинг содир бўлмаслигига чин дилдан умид қилмоқда.
Сўнгги ойлар ичида АҚШ ва Куба ўртасидаги тарангликлар ошди. Бунга сабаб, АҚШнинг Венесуэла операцияси бўлиб, президент Николас Мадуронинг ҳибсга олиниши ва унинг Куба раҳбарияти билан яқин алоқаси бўлди. Ушбу операциядан сўнг АҚШ Президенти Доналд Трамп ва Давлат котиби Марко Рубио Кубага ҳарбий аралашув эҳтимоли мавжудлигини билдирди.
Январь ойида Президент Трамп Кубага нефть етказиб берадиган мамлакатларга тарифлар жорий этишни буюрувчи фармонни имзолади.
Шундан кейин оролда аҳолига доимий равишда электр узилиши кузатилмоқда. Ушбу ойда мамлакат уч марта электрсиз қолди. Фернандез де Кассио блокадани АҚШнинг Куба билан агрессияси натижаси деб атади ва унинг “чексиз давом эта олмаслигини” таъкидлади.
Трамп эса шу ой бошида Кубани тез орада “қулашини” ва раҳбарлар билан келишув тузишга интилаётганини билдирган. Кейинчалик у “Кубани эгаллаш” шарафига эга бўлишини, уни ҳар қандай йўл билан босиб олишини айтган эди.
Фернандез де Кассио бу баёнотга жавобан: “Биз нима ҳақида гаплашаётганларини билмаймиз. Лекин шуни айтишим мумкинки, Куба суверен давлат ва суверенлик ҳуқуқига эга,”, — деди.
Аввалроқ Куба президенти ҳам мамлакат АҚШнинг ҳар қандай ҳужумига енгиб бўлмайдиган қаршилик кўрсатишини билдирган эди.
