“Ҳўрмуз бўғози дўст давлатлар учун очиқ” — Эрон ТИВ раҳбари
Аббос Ароқчи бўғоз фақат душман давлатлар ва уларнинг иттифоқчилари учун ёпиқлигини билдирди.
Эрон Ташқи ишлар вазири Аббос Ароқчи давлат телевидениясига берган интервьюсида Ҳўрмуз бўғозининг дўст давлатлар, жумладан Ҳиндистон, Россия, Хитой, Покистон ва Ироқ кемалари учун очиқ эканини маълум қилди.
Вазирнинг сўзларига кўра, бўғоз жаҳон нефть ва газ савдосининг тахминан бешдан бир қисмини ташкил этса-да, у бутунлай ёпилмаган.
“Бизга хавфсиз ўтиш учун сўров билдирган дўст давлатлар кемаларига қуролли кучларимиз орқали хавфсиз ўтиш таъминланди. Бу кейинчалик ҳам давом этади”, – деди Ароқчи.
Шунингдек, вазир АҚШ, Исроил ва уларнинг иттифоқчиларига тегишли кемаларнинг бўғоздан ўтишига рухсат берилмаслигини таъкидлади.
“Минтақада уруш бўляпти. Душманларимиз ва уларнинг иттифоқчилари учун Ҳўрмуз бўғозидан ўтиш тақиқланади. Бошқаларга эса йўл очиқ”, – деди вазир.
Мазкур баёнот, БМТ Бош котиби Антонио Гутерришнинг Ҳўрмуз бўғозини қайта очиш чақирувидан сўнг эълон қилинди. Шу билан бирга, Эрон ҳозирча АҚШ билан музокара ўтказиш режаси йўқлигини маълум қилган.
