Ўзбекистон фуқаролари Италияга мавсумий ишга жалб қилинади
Пилот лойиҳа доирасида 100 нафар ўзбекистонлик иш билан таъминлади.
Ўзбекистонликлар Италиянинг аграр соҳасига ишга жалб этилади. Бу ҳақда Миграция агентлиги хабар берди.
Маълум қилинишича, Миграция агентлиги раҳбари Беҳзод Мусаев, Қишлоқ хўжалиги вазири Иброҳим Абдураҳмонов, Италия Қишлоқ хўжалиги вазири Франческо Лоллобрижида, шунингдек, Confagricoltura ташкилоти витсе-президенти Лука Бронделли иштирокида учрашув бўлиб ўтди.
Мазкур учрашувда Ўзбекистон фуқароларини Италиянинг аграр соҳасига ишга жалб этиш бўйича келишувга эришилган.
Шунингдек, Миграция агентлиги ҳамда Италиянинг Associazione Imprese Ortofrutticole ташкилоти ўртасида ҳамкорлик битими имзоланди.
Ушбу келишувга кўра, ўзбекистонликлар Италияга 3 ойдан 9 ойгача бўлган мавсумий ишларга жалб этилади.
Associazione Imprese Ortofrutticole ассоциацияси Италияда мева-сабзавот соҳасидаги 35 дан ортиқ йирик компанияни бирлаштириб, фермерликдан тортиб қайта ишлаш, логистика ва экспортгача бўлган тўлиқ агросаноат занжирини қамраб олади. Асосий маҳсулотлари: олма, киви, анор, қулупнай каби мевалар.
Ассоциация президенти Марко Салви жорий йилнинг ўзида пилот лойиҳа доирасида 100 нафар ўзбекистонликни иш билан таъминлашга тайёр эканлигини билдирган.
Аввалроқ Ўзбекистон фуқаролари АҚШга қишлоқ хўжалиги соҳасидаги 9–10 ой давом этадиган мавсумий ишларга жалб қилиниши, ўртача ойлик 3 500 долларни ташкил қилиши ҳақида хабар берилганди.
