Қуруқликдаги эҳтимолий ҳарбий амалиёт учун Эрон бир миллион аскарини сафарбар қилди — Меhr

Яқин Шарқдаги ҳамда Вашингтон билан муносабатлардаги ҳарбий-сиёсий кескинликнинг кучайиши Теҳронни эҳтимолий таҳдидларга қарши туриш учун кенг кўламли сафарбарликни бошлашга ундади. Бу ҳақда Point нашри Mehr ахборот агентлигига таяниб хабар берди.

 

Меҳр агентлигининг мазкур масаладан хабардор манбага таяниб ёзишича, АҚШ қўшинларига қарши эҳтимолий қуруқликдаги тўқнашув учун бир миллиондан ортиқ эронлик жангчилар сафарбар этилган.

 

Эроннинг Tasnim агентлиги ҳам агар АҚШ қуруқликдан ҳужум бошласа, америкалик ҳарбийлар учун “тарихий дўзах” яратиш ғояси атрофида ҳарбийлар орасида “кучли руҳий кўтаринкилик” юзага келганини ёзмоқда. 

 

Қайд этилишича, сўнгги кунларда эронлик ёшлар томонидан “Басиж” тузилмалари, Ислом инқилоби қўриқчилари корпуси ва мунтазам армия сафига қўшилиш истаги билан берилаётган аризалар сони кескин ошган.

 

“Қўшма Штатлар Ҳўрмуз бўғозини ўзини ҳалокатга олиб борувчи тактика орқали очмоқчи; майли. Биз уларнинг бундай ъўзини йўқ қилиш стратегиясиъни амалга оширишига ҳам, бўғознинг ёпиқ қолишига ҳам тайёрмиз”, — дея маълум қилган бир ҳарбий.

 

Мазкур хабар АҚШ президенти Доналд Трампнинг стратегик аҳамиятга эга нефть маркази бўлган ва муҳим денгиз йўлини назорат қилишга хизмат қилувчи Харг оролини эгаллаш билан таҳдид қилгани фонида янгради.

 

Эрон давлат телевидениеси 25 март куни Теҳрон расмийлари ўт очишни тўхтатиш бўйича таклифни рад этганини маълум қилган. Бунинг ўрнига Эрон АҚШнинг Форс кўрфазидаги барча ҳарбий базаларини ёпишни, товон пули тўланишини ҳамда Исроилнинг “Ҳизбуллоҳ”га қарши амалга ошираётган зарбаларини тўхтатишни талаб қилмоқда.

 

“Эрон Ҳўрмуз бўғозини ўз назоратига олишни кўзламоқда. Бу Мисрнинг Сувайш каналига нисбатан юритган сиёсатига ўхшаш сценарий бўлиб, унга кўра бўғоздан ўтувчи кемалардан транзит тўловлари ундирилиши мумкин”, дейилади хабарда.

Аввалроқ Қўшма Штатлар яқин орада Эрон ҳудудида қуруқлик амалиёти ўтказиши режалаштираётгани ҳақида хабар бергандик.