Мужтабо Хоманаийнинг маслаҳатчиси оғир яраланган — Al Hadath

Эрон олий раҳнамоси Мужтабо Хоманаийнинг маслаҳатчиси Камол Харрозий авиаҳужумлар оқибатида оғир яраланган. Бу ҳақда Al Hadath телеканали хабар берди.

 

Манбаларга кўра, Теҳронга уюштирилган зарбалар вақтида Харрозий нишонга олинган ва жароҳат олган. Унинг аҳволи оғир экани айтилмоқда. Эрон расмийлари ҳозирча ушбу хабар юзасидан расмий изоҳ бермаган.

 

Аввалроқ АҚШ ва Исроил томонидан 28 февраль куни бошланган ҳужумлар оқибатида Эроннинг олий раҳнамоси Оятуллоҳ Али Хоманаий ҳалок бўлган, у билан бирга унинг яқин оила аъзолари — келини, қизи ва набираси ҳам вафот этгани эълон қилинган.

 

Шундан сўнг Мужтаба Хоманаий отасининг ўрнини эгаллаб, Эроннинг янги олий раҳнамосига айлангани маълум қилинган. Айрим манбаларда у ҳам ҳаво ҳужумлари вақтида жароҳат олгани ва Россияга олиб кетилгани қайд этилган.

 

Кувайтнинг Al Jarida нашри манбасига кўра, Мужтабо Хоманаий Москвага етказилгач, жарроҳлик амалиётини ўтказган ва ҳозирда Россия президенти Владимир Путиннинг қароргоҳларидан биридаги хусусий тиббиёт муассасасида даволанмоқда.

 

Манбаларда унинг даволаниши кучайтирилган хавфсизлик чораларига риоя этилган ҳолда олиб борилаётгани қайд этилган. Хусусан, эҳтимолий суиқасд таҳдидлари сабабли унинг жойлашуви сир тутилмоқда.

 

Эрон Ташқи ишлар вазирлиги матбуот котиби Исмоил Бағоий эса олий раҳнамо саломатлиги ҳақида изоҳ бериб, унинг аҳволи барқарор эканини билдирган. Унинг таъкидлашича, уруш шароитида Мужтабо Хоманаийнинг омма олдида кўриниш бериши учун маълум вақт талаб этилиши табиий ҳол.