Сирдарёда 11-синф ўқувчиси синфдош қизни калтаклади
Бола синфдоши билан тортишув оқибатида унга тан жароҳати етказган.
Сирдарё вилоятининг Сайхунобод туманидаги умумтаълим мактабларидан бирида ўқувчилар ўртасида содир бўлган жанжал юзасидан жиноят иши қўзғатилди. Бу ҳақда вилоят Ички ишлар бошқармаси маълум қилди.
Ижтимоий тармоқларда мактаб ўқувчилари ўртасидаги жанжал акс этган видео тарқалди.
Ўрганишлар давомида мазкур ҳолат жорий йилнинг 31 март куни Сайхунобод туманидаги мактаблардан бирида содир бўлгани аниқланган.
Маълум қилинишига кўра, 11-синф ўқувчиси М.М. синфдоши Б.Ш. билан ўзаро тортишув оқибатида унинг юз қисмига қўли билан уриб, тан жароҳати етказган.
Ҳозирда мазкур ҳолат юзасидан Жиноят кодексининг 277-моддаси (безорилик) билан жиноят иши қўзғатилган бўлиб, тергов ҳаракатлари олиб борилмоқда.
Аввалроқ Самарқанд вилоятининг Ургут туманидаги мактаб директори ўринбосари 9-синф ўқувчисини калтаклади деган хабар берилган эди.
