Эрон урушининг 2 ҳафтага тўхтагани фонида нефть нархлари пасайди

АҚШ президенти Доналд Трамп томонидан Эрон билан икки ҳафталик сулҳ эълон қилиниши ортидан жаҳон молия бозорларида кескин ижобий ўзгаришлар кузатилди. Бу ҳақда Al Jazeera хабар берди.

 

Нефть нархлари тушиб кетди, акциялар қимматлашди ва облигациялар бозорида ўсиш қайд этилди.

 

Аввал хабар қилганимиздек, АҚШ Эронга қарши ҳарбий ҳаракатларни икки ҳафтага тўхтатишга рози бўлган. Шу билан бирга, томонлар ўртасида узоқ муддатли тинчлик келишуви бўйича музокаралар давом этмоқда.

 

Эрон расмийлари эса, агар мамлакатга қарши ҳужумлар тўхтатилса, ўз ҳужумларини ҳам тўхтатишини билдирган. Шунингдек, икки ҳафта давомида Ҳўрмуз бўғози орқали кемаларнинг хавфсиз ҳаракати Эрон Қуролли кучлари билан мувофиқлаштирилиши маълум қилинган.

 

Февраль ойи охирида АҚШ ва Исроил томонидан Эронга берилган зарбалардан сўнг жаҳон бозорларида беқарорлик кучайган эди. Бу эса жаҳон нефть ва газ таъминотининг катта қисми ўтадиган Ҳўрмуз бўғозининг амалий ёпилишига сабаб бўлган.

 

Сўнгги маълумотларга кўра, оташкесим эълон қилингач, АҚШ нефти фьючерслари қарийб 16,5 фоизга тушиб, баррели 94 доллар атрофида савдо қилинмоқда. Шу билан бирга, S&P 500 индекси фьючерслари 2 фоиздан ортиққа ошган, доллар эса қадрсизланган.

 

Мутахассислар фикрича, мазкур сулҳ қисқа муддатли бўлса-да, бозорлар учун “енгиллик сигнали” вазифасини бажармоқда. Айни пайтда, Осиё фонд бозорларида ҳам ўсиш кутилмоқда, АҚШ давлат облигациялари фьючерслари эса юқорига қараб ҳаракатланмоқда.

 

Шунингдек, АҚШ томони Эрондан 10 банддан иборат таклиф олганини ва у музокаралар учун асос бўлиши мумкинлигини билдирган. Томонлар узоқ муддатли келишувга эришишга яқин экани истисно қилинмаяпти.

 

Таҳлилчиларга кўра, бу жараён ижобий бошланиш бўлса-да, ҳали ҳал этилиши лозим бўлган қатор масалалар сақланиб қолмоқда.