Туркия расмийси Истанбулда содир бўлган отишма юзасидан расмий баёнот берди
Ҳужум қилганларнинг шахси аниқланиб, ҳодиса юзасидан тергов ишлари бошланган.
Туркиянинг Истанбул шаҳрида жойлашган “Япı Kredi Plaza” бинолари олдида хизмат қилаётган полиция ходимларига қарши қуролли ҳужум амалга оширилгани юзасидан Туркия Президенти ҳузуридаги Коммуникация бошқармаси раҳбари Бурҳанеттин Дуран расмий баёнот берди.
Расмий баёнотга кўра, ҳужум уюштирган 3 нафар шахс зарарсизлантирилган. Хавфсизлик кучларининг тезкор ва қатъий ҳаракати натижасида эҳтимолий йирик хавфнинг олди олинган.
Шунингдек, қуролли тўқнашув давомида 2 нафар полиция ходими енгил жароҳат олган. Уларга тиббий ёрдам кўрсатилмоқда.
Маълум қилинишича, ҳужум қилганларнинг шахси аниқланган бўлиб, ҳодиса юзасидан тергов ишлари бошланган. Расмийлар ушбу ҳодиса Туркиянинг “террорсиз давлат” ва “террорсиз минтақа” барпо этиш йўлидаги қатъиятига таъсир кўрсатмаслигини таъкидлаган.
Аввалроқ Истанбулда жойлашган Исроил консулхонаси биноси ташқарисида полиция ва ҳужумчилар ўртасида узоқ давом этган отишмада икки нафар ҳужумчи ўлдирилиб, улардан бири оғир яралангани ҳақида хабар берилганди.
