Тошкентдаги “Аския” бозори вақтинча ёпилди

Тошкент шаҳридаги “Аския” деҳқон бозори ёнғин хавфсизлиги қоидалари қўпол равишда бузилгани сабаб вақтинча ёпилди. Бу ҳақда Фавқулодда вазиятлар вазирлиги хабар берди.

 

Маълум қилинишича, пойтахтнинг бир қатор бозорларида давлат ёнғин назорати томонидан текширувлар ўтказилган. Натижада айрим савдо объектларида жиддий камчиликлар аниқланиб, хавфсизлик талабларига жавоб бермаган ҳудудлар электр таъминотидан вақтинча узилган.

 

Хусусан, Мирзо Улуғбек туманидаги “Наврўз” деҳқон бозори, Бектемир туманидаги Мидстрой сервис МЧЖ ва “Қўйлиқ” қурилиш бозори, Чилонзордаги Tashkent trade center МЧЖ ҳамда “Абу Сахий” бозори, шунингдек Учтепа туманидаги “Фарҳод” деҳқон бозори айрим ҳудудларида ёнғин хавфсизлиги қоидалари бузилгани аниқланган ва айрим ҳудудлар, камчилик аниқланган жойлар электр энергиясидан вақтинча узилди. Бундан ташқари, “Ўрикзор” савдо комплексининг тўққизта блоки ҳам электр энергиясидан узилган.

 

Яккасарой туманида жойлашган “Аския” деҳқон бозори эса умумий ҳолати хавфсизлик талабларига жавоб бермагани сабаб тўлиқ электр таъминотидан узилиб, фаолияти вақтинча тўхтатилган.

 

Вазирликка кўра, аниқланган камчиликлар бартараф этилгач, ушбу объектларда электр таъминоти тикланади ва фаолият қайта йўлга қўйилади.

 

Шунингдек, қайд этилишича, ушбу чоралар тадбиркорлар фаолиятига тўсқинлик қилиш учун эмас, балки фавқулодда вазиятларнинг олдини олиш ҳамда аҳоли гавжум жойларда хавфсиз муҳитни таъминлашга қаратилган.

 

8 апрель куни Чилонзор, Шайхонтоҳур ва Яшнобод туманларидаги йирик бозорларда ҳам шундай текширувлар ўтказилиб, очиқ электр симлари, носоз жиҳозлар ва ёнғин ўчириш тизимларининг ишламаслиги каби камчиликлар аниқланган эди. Ушбу ҳолатлар асосида айрим ҳудудлар электр таъминотидан узилган.

 

Текширувлар 5 апрель куни Чилонзор туманидаги “Бешқўрғон” бозорида юз берган ёнғин ортидан янада кучайтирилган.