Тошкентда ходимларига дайди топишни буюрган ИИБ амалдори ишдан бўшатилди
У дайди тополмаган ходимларга қариндоши ёки ўзини “дайди” сифатида расмийлаштириш бўйича топшириқ берган эди.
Тошкент шаҳри Олмазор тумани Ички ишлар бўлими (ИИБ) амалдори Аброр Худойбердиев инспекторларга дайди топиб расмийлаштириш бўйича топшириқ бергани учун лавозимидан озод этилди. Бу ҳақда 11 апрель куни Ички ишлар вазирлиги томонидан ўтказилган матбуот анжуманида вазир ўринбосари Рамазон Ашропов маълум қилди, дея хабар бермоқда Kun.uz.
Қайд этилишича, амалдор профилактика инспекторларига кўчадан дайди шахсларни топиб, уларга нисбатан маъмурий баённома расмийлаштириш бўйича топшириқ берган. Ҳолат юзасидан ўтказилган хизмат текшируви якунларига кўра, у эгаллаб турган лавозимидан бўшатилган.
Аввалроқ ижтимоий тармоқларда Худойбердиевнинг ходимларга “дайди топиб, 300 та маъмурий баённома тузиш” режасини белгилаб бергани акс этган аудио тарқалиб, кенг жамоатчилик муҳокамасига сабаб бўлганди. Аудиода у дайди топа олмаган ходимларга ўз қариндоши ёки ўзини “дайди” сифатида расмийлаштириш бўйича топшириқ бергани қайд этилган.
