Хитой танкери АҚШ блокадасига қарамай Ҳормуз бўғозидан ўтди
Хитой АҚШни Эрон нефтини олиш учун Ҳормуз бўғозига ўз танкерларини юборишда давом этиши ҳақида огоҳлантирган эди.
Хитойга тегишли “Rich Starry” танкери АҚШ томонидан эълон қилинган денгиз блокадасига қарамай Ҳормуз бўғозидан ўтиб кетди. Бу ҳақда Reuters хабар берди.
Маълум қилинишича, “Rich Starry” танкери аввал “Full Star” номи билан танилган. 2023 йилда у Теҳронга энергетика санкцияларини четлаб ўтишда ёрдам бергани учун санкциялар рўйхатига киритилган.
Bloomberg бу танкернинг сўнгги бир сутка ичида Форс кўрфазидан чиқишга бўлган иккинчи уриниши эканини ёзган. АҚШ блокадаси кучга кирган пайтда кема Эроннинг Кешм ороли яқинидаги тор ҳудуд томон йўл олган, бироқ кейинчалик йўналишини ўзгартирган. Бир неча соатдан сўнг эса яна ҳаракатни давом эттириб, ўзининг Хитойга тегишли экани ва экипажи хитойликлардан иборатлигини билдирувчи сигнал узатган.
MarineTraffic маълумотларига кўра, танкер Малави байроғи остида ҳаракатланган. Бироқ ушбу давлат расмийлари мамлакатда кемалар бўйича расмий реестр мавжуд эмаслигини маълум қилган.
Шу билан бирга, “Elpis” номли яна бир кема ҳам АҚШ блокадаси бошланиши билан бир вақтда Ҳормуз бўғозидан Уммон қўлтиғига кирган.
АҚШ ва Эрон делегациялари ўртасидаги музокаралар натижасиз якунлангач, Доналд Трумп АҚШ ҳарбий-денгиз кучлари “Ҳормуз бўғозига кираётган ёки ундан чиқаётган барча кемаларни истисносиз блоклашни бошлашини” эълон қилганди.
Кейинчалик АҚШ Марказий қўмондонлиги ушбу баёнотга аниқлик киритиб, блокада асосан Эрон портларига йўл олаётган кемаларга нисбатан қўлланишини билдирган. Бошқа давлатлар портларига қатнаётган ва қайтаётган кемаларнинг Ҳормуз бўғози орқали ҳаракатланишига тўсқинлик қилинмаслиги таъкидланган.
Хитой ташқи ишлар вазири Ван Йи душанба куни Пекинда БАА президентининг Хитой бўйича махсус элчиси Халдун Халифа ал-Муборак билан учрашувда Ҳормуз бўғозининг блокадаси халқаро ҳамжамиятнинг умумий манфаатларига зид эканини айтган.
Хитой АҚШни Трампнинг қамалини эътиборсиз қолдириши ва Эрон нефтини олиш учун Ҳормуз бўғозига ўз танкерларини юборишда давом этиши ҳақида огоҳлантирган.
Пекин, шунингдек, Вашингтонга савдо кемалари фаолиятига аралашишга йўл қўйиб бўлмаслигини билдирган.
