Австралиядаги йирик нефтни қайта ишлаш заводида ёнғин юз берди
Мазкур ёнғин глобал ёнилғи инқирози фонида мамлакатда бензин таъминоти билан боғлиқ хавотирларни янада кучайтирди.
Австралиядаги йирик нефтни қайта ишлаш заводида юз берган ёнғин мамлакатда ёнилғи таъминоти билан боғлиқ хавотирларни кучайтирди. Бу ҳақда BBC хабар берди.
Маълум қилинишича, Мелбурндан жануби-ғарбда жойлашган Гилонг шаҳридаги Viva Energy компаниясига қарашли Corio нефтни қайта ишлаш заводида 16 апрелга ўтар кечаси ёнғин содир бўлди. Фавқулодда хизматлар портлаш ва алангалар ҳақидаги хабарлардан сўнг ҳодиса жойига етиб борган.
Ёнғин 13 соат давом этиб, пайшанба куни ўчирилди. Ҳодиса вақтида завод ҳудудида бўлган ўнлаб ишчилар эвакуация қилинган. жабрланганлар йўқ.
Мазкур завод Виктория штати ёқилғисининг қарийб 50 фоизини, мамлакат бўйича эса 10 фоизини ишлаб чиқаради. Ҳозирда у қисман фаолият юритмоқда, бироқ ҳукумат бензин ишлаб чиқариш ҳажмига таъсир бўлиши мумкинлигини билдирди.
Австралия энергетика вазири Чрис Боwен ёнғин глобал ёқилғи инқирози шароитида юз берганини таъкидлади. Унинг сўзларига кўра, Эронда уруш бошлангач, мамлакатда ёқилғи таъминоти аллақачон босим остида қолган.
Сўнгги ҳафталарда дизель нархлари кескин ошиб, айрим ҳудудларда ёқилғи танқислиги ва ваҳимали харидлар кузатилмоқда. Авиакомпаниялар эса авиаёқилғи нархи кўтарилгани сабаб айрим рейсларни қисқартирмоқда.
Дастлабки маълумотларга кўра, ёнғинга ускунадаги носозлик сабаб бўлган. Ҳодиса юзасидан тергов ишлари олиб борилмоқда.
Viva Energy бош директори Сcотт Wyatt ёнғин бензин ишлаб чиқаришнинг икки бўлинмасига зарар етказганини, бошқа қисмлар эса сақланиб қолганини маълум қилди. Унинг айтишича, хавфсизлик чораси сифатида бензин, дизель ва авиаёқилғи ишлаб чиқариш вақтинча камайтирилган.
Мутахассислар Австралия асосан Сингапур, Жанубий Корея ва Малайзиядан импорт қилинадиган ёқилғига таянишини билдириб, бу ҳолат қисқа муддатда таъминот узилишларини юмшатиши мумкинлигини қайд этмоқда. Бироқ улар мавжуд захиралар хавф остида қолаётганини ҳам таъкидламоқда.
Гилонг шаҳри мери Стретч Контелж ушбу ҳодисани “мисли кўрилмаган” дея баҳолаб, унинг саноат учун катта зарба бўлганини билдирди.
Аввалроқ Австралия ҳукумати глобал иқтисодий босимлардан аҳолини тўлиқ ҳимоя қила олмаслигини билдирган эди.
