Денгиз блокадаси бекор қилинса, Эрон билан келишувга эришиш қийинлашади — Трамп
АҚШ президентига кўра, Эрон Ҳормуз бўғози ёпилгани сабаб кунига 500 миллион доллар даромад йўқотмоқда.
Доналд Трамп Эрон атрофидаги денгиз блокадаси бекор қилинадиган бўлса, Теҳрон билан келишувга эришиш имконияти кескин камайишини маълум қилди.
АҚШ президенти бу ҳақда Truth Social ижтимоий тармоғидаги саҳифасида баёнот берган. Унинг таъкидлашича, Эрон Ҳормуз бўғозининг очилишидан манфаатдор, чунки нефть савдосидан катта даромад йўқотмоқда.
Трампнинг сўзларига кўра, Эрон бўғоз ёпилиши сабабли кунига қарийб 500 миллион доллар миқдоридаги тушумдан маҳрум бўлмоқда.
“Эрон бўғоз очилишини истамоқда. Агар блокада бекор қилинса, улар билан келишувга эришиш анча мушкул бўлади”, — деди АҚШ президенти.
Шунингдек, у босим чораларининг сақланиб қолиши музокараларда муҳим омил эканини таъкидлаб, мавжуд чекловлар Теҳронни музокараларга ундаётган асосий воситалардан бири эканини қайд этган.
Эслатиб ўтамиз, аввалроқ Доналд Трамп Эрон билан вақтинчалик сулҳ муддатини узайтириш бўйича қарор қабул қилинганини маълум қилган эди.
