Ўзбекистоннинг 9 ҳудудида сел хавфи эълон қилинди
Айрим ҳудудларда ёмғир сувлари тўпланиб, сув босиш ҳолатлари юз бериши мумкин.
“Ўзгидромет” 8–12-май кунлари республика ҳудудида кузатилиши кутилаётган кучли ёмғирлар сабаб қатор тоғолди ва тоғли ҳудудларда сел-сув тошқини ҳодисалари юзага келиши мумкинлиги ҳақида огоҳлантирди.
Маълум қилинишича, Қашқадарё вилоятининг Яккабоғ, Деҳқонобод, Чироқчи, Китоб, Шаҳрисабз, Қамаши ва Ғузор туманларида сел келиши хавфи мавжуд.
Шунингдек, Сурхондарё вилоятининг Сариосиё, Узун, Олтинсой, Денов, Бойсун, Шеробод, Шўрчи, Қумқўрғон ва Музработ туманларида ҳам сел-сув тошқини ҳодисалари кузатилиши мумкинлиги билдирилди.
Огоҳлантириш Самарқанд вилоятининг Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой ва Иштихон туманларига, Навоий вилоятининг Хатирчи, Навбаҳор, Нурота, Конимех ва Кармана туманларига ҳам тааллуқли.
Бундан ташқари, Жиззах вилоятининг Зомин, Бахмал, Ғаллаорол, Шароф Рашидов, Фориш ва Янгиобод туманларида, Тошкент вилоятининг Оҳангарон, Бўстонлиқ, Паркент, Пискент, Ўрта Чирчиқ ва Юқори Чирчиқ туманлари ҳамда Ангрен ва Олмалиқ шаҳарларида ҳам хавф сақланиб қолмоқда.
Наманган вилоятининг Поп, Косонсой, Чортоқ, Чуст, Наманган ва Янгиқўрғон туманлари, Фарғона вилоятининг Сўх, Шоҳимардон, Фарғона ва Бешариқ туманлари ҳамда Андижон вилоятининг Андижон, Асака, Жалақудуқ, Қўрғонтепа, Пахтаобод, Избоскан, Хўжаобод ва Марҳамат туманлари ҳамда Хонобод шаҳрида ҳам сел келиши эҳтимоли қайд этилди.
Мутахассислар айрим ҳудудларда ёмғир сувлари тўпланиб, ҳудудларни сув босиши мумкинлигини ҳам маълум қилди.
“Ўзгидромет” тоғолди ва тоғли ҳудудларда яшовчи фуқаролар, дам олувчилар ҳамда ҳайдовчилардан эҳтиёт чораларини кўриш, хавфли ҳудудларда ҳаракатланишда ҳушёр бўлишни сўради.
Эслатиб ўтамиз, аввалроқ кучли ёғингарчилик оқибатида Чорсу метро бекати кириш қисмига сув тошгани ҳақида хабар берилганди.
