“Чорсу” метро кириш қисмида дренаж тизими тикланмоқда
Дренаж тармоқларининг ёпилиши сув оқимини чеклаб, метро киришида сув тўпланишига сабаб бўлган.
Тошкент шаҳридаги «Чорсу» метро бекати кириш қисмида юзага келган сув тўпланиши ҳолати юзасидан дренаж тизимини тиклаш ишлари бошланди.
Пойтахт ҳокимлиги маълумотига кўра, 3 май куни кузатилган ёғингарчилик вақтида ҳудуддаги ирригация ва дренаж тармоқларининг айрим қисмлари ноқонуний равишда ёпиб қўйилгани сув оқимининг чекланишига олиб келган. Натижада метро бекати кириш қисмида сув йиғилиши кузатилган.
Мутахассисларнинг таъкидлашича, мавжуд дренаж тизими суткасига 20 мм ёғингарчиликни қабул қилиш қувватига эга. Бироқ мазкур ҳолатда икки соат давомида ёғган 12 мм ёмғирга қарамай, тизим тўлиқ ишламаган. Бунга айрим ҳудудларда автотураргоҳлар ва пиёдалар йўлаклари қурилиши жараёнида ирригация тармоқларининг тўсиб қўйилгани сабаб бўлган.
Шунингдек, илгари мазкур ҳудудда бундай муаммолар кузатилмагани, чунки дренаж тизимлари тўлиқ ва узлуксиз фаолият юритгани қайд этилди.
Вазиятни бартараф этиш мақсадида ҳозирда ёпиб қўйилган дренаж тармоқларини тозалаш, уларни қайта тиклаш ҳамда янги муҳандислик коммуникацияларини ётқизиш ишлари олиб борилмоқда. Келгусида шунга ўхшаш ҳолатларнинг олдини олиш учун 36 км узунликдаги ирригация ва дренаж тармоқларини қамраб олувчи комплекс мастер-режа ишлаб чиқилган.
