10 минг қадам учун пул тўлайдиган платформа ишга тушган — Экоқўмита
“Эко-фаол фуқаро” платформаси 1 майдан фаолият бошлаган бўлиб, уни App Store ва Play Market орқали юклаб олиш мумкин.
Ўзбекистонда аҳолининг экологик маданиятини ошириш ва соғлом турмуш тарзини тарғиб қилишга қаратилган “Эко-фаол фуқаро” платформаси ишга туширилди. Бу ҳақда Экология қўмитаси матбуот хизмати Zamon.uz'га маълум қилди.
Қўмита маълумотига кўра, платформа 1 майдан фаолият бошлаган бўлиб, уни App Store ва Play Market орқали юклаб олиш мумкин.
Лойиҳа президентнинг “Эко-маданият” умуммиллий лойиҳаси доирасида экологик таълим, илм-фан ва тарғиботни жадаллаштиришга оид қарори асосида амалга оширилмоқда. Ҳужжатда “10 минг қадам пиёда” тажрибасини қайта тиклаш ҳамда “Соғлом турмуш тарзи” платформаси фаолиятини йўлга қўйиш белгиланган.
Экология қўмитасининг билдиришича, “10 минг қадам пиёда” акцияси доирасида фуқароларни рағбатлантириш, жумладан пул тўлаш тартибини ишлаб чиқиш ишлари босқичма-босқич давом этмоқда.
Аввалроқ Ўзбекистонда “10 минг қадам пиёда” ташаббуси 1 майдан қайта ишга туширилиши маълум қилинган эди.
Шунингдек, “1hls.uz” платформаси фаолияти учун ҳар йили Махсус жамғарма ҳисобидан 10 миллиард сўм ажратилиши белгиланган.
Маълумот учун, аҳоли орасида кунлик юриш ва югуришни оммалаштириш мақсадида 2021 йилнинг 1 июнида “Соғлом турмуш тарзи” — “1hls.uz” платформаси ишга туширилганди. Лойиҳага мувофиқ, 10 минг қадам юрган фуқароларга 3 минг сўмдан пул тўлаш йўлга қўйилганди. Лойиҳа президентнинг 2022 йил 6 апрелдаги фармони билан бекор қилинганди.
