Саида Мирзиёева Лондонда сиёсатчилар ва халқаро молия ташкилотлари раҳбарлари билан учрашди
Учрашувларда UzNIF фондининг халқаро бозорга чиқиши, ESG стандартлари, “яшил” облигациялар ва ўзбек компанияларининг глобал бозорларга интеграцияси масалаларини муҳокама қилинди.
Саида Мирзиёева Лондонда Буюк Британия ва АҚШ вакиллари ҳамда халқаро молия ташкилотлари раҳбарлари билан учрашувлар ўтказди.
Президент администрацияси раҳбари Буюк Британия бош вазирининг инвестициялар бўйича маслаҳатчиси Варун Чандра ҳамда Марказий Осиё ва Озарбайжон бўйича савдо вакили Жон Олдердайс билан мулоқот қилганини маълум қилди.
Учрашув давомида UzNIF фондининг халқаро бозорларга муваффақиятли чиқиши ва Британия ишбилармон доираларининг Ўзбекистонга қизиқиши ортиб бораётгани муҳокама қилинган.
Қайд этилишича, Буюк Британиядан Ўзбекистонга йўналтирилган инвестициялар ҳажми 1 миллиард доллардан ошган.
Шунингдек, Мирзиёева дунёдаги йирик актив бошқарув компанияларидан бири — "Franklin Templeton" бош ижрочи директори Женни Жонсон билан ҳам учрашув ўтказган.
Томонлар Ўзбекистонда капитал бозорини ривожлантириш, молиявий бошқарувга оид қонунчиликни такомиллаштириш, халқаро клиринг тизимлари билан интеграция ҳамда Тошкент халқаро молия марказини ташкил этиш масалаларини муҳокама қилган.
Саида Мирзиёеванинг қайд этишича, Женни Жонсон IPO жараёнига тайёргарлик қисқа муддатда амалга оширилгани ва ўзбек компаниялари акциялари савдоси юқори натижалар кўрсатаётганини таъкидлаган.
Бундан ташқари, Лондонда АҚШ президентининг Жанубий ва Марказий Осиё бўйича махсус вакили, элчи Сержио Гор билан ҳам учрашув бўлиб ўтган.
Мулоқот давомида томонлар ўзаро алоқаларни янада мустаҳкамлаш истиқболлари ва келгусидаги ҳамкорлик йўналишларини муҳокама қилган.
Аввалроқ Саида Мирзиёева Лондон фонд биржаси бош ижрочи директори Жулиа Энн Хоггетт билан ҳам учрашгани хабар қилинганди.
