Туркияда ресторандаги отишма оқибатида 4 киши ҳалок бўлди
Гумондорни қўлга олиш учун вертолётлар ёрдамида қидирув ишлари бошланган. У 17 ёшда экани айтилмоқда.
Туркиянинг Мерсин вилоятида қуролли ҳужум оқибатида 4 киши ҳалок бўлди, яна 8 киши яраланди. Бу ҳақда "Haberler" нашри хабар берди.
Маълум қилинишича, ҳодиса Тарсус туманига қарашли Каделли Дёртлер маҳалласида юз берган. Гумондор М.O. маҳаллий ошхоналардан бирига бостириб кириб, милтиқда ўқ уза бошлаган. Оқибатда муассаса эгаси Сабри Пан шифохонада вафот этган, ходим Аҳмет Эржан Жан эса воқеа жойида ҳалок бўлган.
“Мерсиннинг Тарсус туманида 17 ёшли М.О. ресторанга қарата автомат билан ўқ узди, натижада ресторан эгаси Сабри Пан ва ходими Аҳмет Эржан Жан ҳалок бўлди”, дейилади хабарда.
Ҳужумдан сўнг автомобилда қочган гумондор йўл давомида яна икки кишини ўлдирган.
Шунингдек, гумондор яна 8 кишига тан жароҳати етказгани айтилмоқда. Ярадорлар туман давлат шифохонасига етказилиб, назоратга олинган.
Воқеа жойига полиция ва тез тиббий ёрдам экипажлари юборилган. Ҳозирда ҳудудда хавфсизлик чоралари кучайтирилган бўлиб, гумондорни қўлга олиш учун вертолётлар ёрдамида қидирув ишлари олиб борилмоқда.
Дастлабки маълумотларга кўра, қурбонлар ва ярадорлар сони ортиши мумкин. Ҳодиса юзасидан тергов ҳаракатлари давом этмоқда.
Эслатиб ўтамиз, 2026 йил 15 апрель куни Туркиянинг жануби-шарқидаги Қаҳраманмараш вилоятидаги мактабда юз берган отишмада тўққиз киши ҳалок бўлган ва 21 киши жароҳатланган эди. 14 апрель куни Шанлиурфа вилоятидаги мактабда ўн тўққиз киши жароҳат олгани хабар қилинган эди.
