Қашқадарёда кучли сел оқибатида 25 ёшли йигит ҳалок бўлди

Қашқадарё вилоятининг Деҳқонобод туманида кучли сел оқими сабаб 25 ёшли йигит ҳалок бўлди. Бу ҳақда “Дарё” хабар берди.

 

Маълум қилинишича, воқеа 19 май куни туманнинг Ғинжак қишлоғида содир бўлган. Адир ҳудудида мол боқиб юрган 25 ёшли йигит сел оқимида оқиб кетган.

 

Қишлоқ аҳолиси вакилларидан бирига кўра, сел жуда юқори босим ва тезликда келгани сабаб йигит ўзини қутқариб қолишга улгурмаган.

 

“Афсуски, кўп ўтмай, сувдан унинг жонсиз танаси топилди”, деган у.

 

Марҳумнинг жасади қутқарувчилар ва маҳаллий аҳоли томонидан олиб борилган қидирув ишларидан сўнг воқеа жойидан тахминан 3 километр узоқликдан топилган.

 

Маҳаллий аҳоли маълумотига кўра, ҳалок бўлган йигит яқинда Россиядан меҳнат муҳожирлигидан қайтган.

 

Ҳодисадан кейин марҳумнинг хонадонига туман ҳокимлиги масъуллари, МФЙ раиси ҳамда маҳалла профилактика инспектори борган.

 

Манбага кўра, туман прокуратураси ходимлари ҳам воқеа жойига келиб, жасадни кўздан кечирган ва экспертиза тайинланган. Марҳумнинг жанозаси 20 май куни ўтказилган.

 

Бош прокуратура матбуот котиби Ҳаёт Шамсутдинов нашр сўровига жавобан воқеа ҳақиқатда содир бўлганини тасдиқлаган.

 

Унинг маълум қилишича, ҳодиса ҳақида 19 май куни соат 20:20 ларда туман ИИБга хабар келиб тушган.

 

“Ҳолат юзасидан туман прокуратураси томонидан терговга қадар текширув ҳаракатлари олиб борилмоқда. Текширув якунларига кўра қонуний қарор қабул қилиниши таъминланади”, деган у.

 

Аввалроқ Фавқулодда вазиятлар вазирлиги Наманган, Жиззах ва Қашқадарё вилоятларида кузатилган сел оқимлари оқибатида уйларга зарар етмагани ҳақида маълумот берганди. 

 

Шунингдек, вазирликка тан жароҳати олганлар бўйича ҳам маълумот келиб тушмагани билдирилган.