ЖССТ Эбола сабаб 139 киши вафот этганини маълум қилди
Вирус билан касалланишнинг қарийб 600 та гумон қилинган ҳолати мавжудлигини билдирди.
Жаҳон соғлиқни сақлаш ташкилоти (ЖССТ) Конго Демократик Республикаси ва Угандада Эбола вируси билан боғлиқ вазият юзасидан янги маълумотларни эълон қилди. Бу ҳақда ТАСС ахборот агентлиги маълум қилди.
ЖССТ бош директори Женевада ўтказилган брифингда маълум қилишича, ҳозирга қадар Эбола билан касалланишнинг қарийб 600 та гумон қилинган ҳолати ҳамда 139 та эҳтимолий ўлим ҳолати қайд этилган.
Унинг таъкидлашича, вирус эпидемияси расман аниқлангунига қадар маълум муддат давомида тарқалган бўлиши мумкин ва шу сабабли касалланиш ҳамда ўлим ҳолатлари сони яна ортиши эҳтимоли мавжуд.
ЖССТ маълумотларига кўра, ҳозирда Конго ҳудудида Эбола вирусининг 51 та тасдиқланган ҳолати аниқланган. Угандада эса икки нафар беморда касаллик лаборатория орқали тасдиқланган.
Ташкилот мутахассислари эпидемиологик кузатув, беморларни изоляция қилиш ҳамда вирус тарқалишининг олдини олиш бўйича чораларни кучайтираётганини билдирган.
