25 май куни давлат ташкилотлари ва идоралари ходимларига хизмат автомашиналаридан фойдаланиш тақиқланади

25 май куни Ўзбекистоннинг барча ҳудудларида “Автомобилсиз кун” акцияси ўтказилади. Бу ҳақда Президентнинг 2026 йил 25 мартдаги “Тоза ҳаво” умуммиллий лойиҳасини амалга ошириш чора-тадбирлари тўғрисидаги фармонида белгиланган.

 

Ҳужжатга кўра, 2026 йил 1 майдан бошлаб ҳар ойнинг 10 ва 25-саналарида “Автомобилсиз кун” ҳамда “Автомобилсиз ҳафта” акциялари ўтказиб борилади.

 

Қайд этилишича, акция кунлари давлат ташкилотлари ва идоралари ходимларига хизмат автотранспорт воситаларидан фойдаланиш қатъиян тақиқланади. Агар мазкур саналар иш кунига тўғри келса, ҳайдовчиларнинг иш ҳақи сақлаб қолинади.

 

Шунингдек, махсус комиссия баёнига мувофиқ, давлат фуқаролик хизматчилари томонидан акция доирасида хизмат автомобилларидан фойдаланиш одоб-ахлоқ қоидаларини бузиш сифатида баҳоланади. Белгиланган талабларга амал қилмаслик эса масъул раҳбарларга ходимларни интизомий жавобгарликка тортиш учун асос бўлади.

 

Экоқўмитанинг маълум қилинишича, ташаббус атмосфера ҳавосига чиқариладиган зарарли газлар миқдорини камайтириш, аҳоли саломатлигини муҳофаза қилиш, экологик барқарор муҳитни шакллантириш ҳамда жамоат транспорти ва экологик тоза транспорт воситаларидан фойдаланиш маданиятини оммалаштиришга қаратилган.

 

Шу билан бирга, акция доирасида тарғибот тадбирлари, оммавий юришлар ва жамоатчилик акциялари ҳам ташкил этилиши режалаштирилган.