Оқ уй яқинида отишма содир бўлди

АҚШ Махфий хизмати Оқ уй яқинида ўт очган шахсни отиб ташлади. Ҳодиса оқибатида тасодифий йўловчилардан бири ҳам яраланган. Бу ҳақда АҚШ Махфий хизмати маълум қилди, дея хабар бермоқда BBC.

 

Маълум қилинишича, номаълум шахс тунда сумкасидан қурол чиқариб, Оқ уй яқинида ўқ уза бошлаган. Шундан сўнг Махфий хизмат ходимлари унга қарата ўт очган.

 

Америка ОАВлари манбаларга таяниб хабар беришича, ҳужумчи 21 ёшли Насир Бест бўлган. У  илгари Махфий хизмат билан тўқнашган ва руҳий касал сифатида рўйхатга олинган.

 

Ҳодиса 24 апрель куни Оқ уй мухбирлари ассоциацияси кечасида юз берган отишмадан бир ой ўтиб содир бўлди. Ўша тадбирда АҚШ президенти Доналд Трамп ҳам иштирок этган эди.

 

Трамп Truth Social'даги саҳифасида Махфий хизматнинг ҳаракатларини мақтаб, ҳужумчини “жиноятчилик ўтмишига эга шахс” деб атади. 

 

Шунингдек, у келажакда президентлар учун янада хавфсиз ҳудудлар яратиш зарурлигини таъкидлади.

 

CNN мухбирлари Оқ уй яқинида ўнлаб ўқ овозлари эшитилганини билдирган. ABC News мухбири Селина Ванг эса X ижтимоий тармоғида воқеа вақтида олинган видеони эълон қилган. Унда Оқ уй яқинида ўқ овозларига ўхшаш товушлар эшитилади.

 

Эслатиб ўтамиз, 24 апрель куни Оқ уй мухбирлари ассоциацияси кечасида ҳам қуролли ҳодиса юз берган, тадбирда АҚШ президенти Доналд Трамп ҳам иштирок этган эди.

 

Ҳибсга олинган Коул Аллен тергов органларига Трамп маъмурияти вакилларига ҳужум уюштириш ниятида бўлганини билдирган.