Vashingtonda Tramp ishtirok etgan tadbirda otishma yuz berdi
AQSh prezidenti, birinchi xonim Melaniya Tramp, vitse-prezident J.D. Vens va boshqa amaldorlar evakuatsiya qilingan.
Vashingtonda AQSh prezidenti Donald Tramp ishtirok etgan rasmiy tadbir vaqtida xavfsizlik bilan bog‘liq favqulodda holat yuz berdi. Bu haqda BBC xabar berdi.
Oq uy muxbirlari uyushmasining an’anaviy qabul marosimi davomida otishma ovozlariga o‘xshash tovushlar eshitilgach, yuqori martabali amaldorlar zudlik bilan evakuatsiya qilingan.
Mahalliy OAV ma’lumotlariga ko‘ra, voqea Washington Hilton mehmonxonasida o‘tkazilayotgan tadbir chog‘ida sodir bo‘lgan. Hodisadan so‘ng Maxfiy xizmat xodimlari prezident Donald Trampni sahnadan olib chiqib ketgan.
Rasmiy manbalarga tayanib xabar qilinishicha, Donald Tramp jarohat olmagan va uning sog‘lig‘i joyida.
Tadbirda ishtirok etgan vitse-prezident J.D. Vens ham xavfsiz hududga olib chiqilgan.
Shuningdek, birinchi xonim Melaniya Tramp, mudofaa vaziri Pit Xegset hamda boshqa yuqori martabali rasmiylar ham zudlik bilan evakuatsiya qilingan.
Voqeadan keyin tadbir to‘xtatilgan va keyinga qoldirilgan. Huquqni muhofaza qiluvchi organlar tomonidan bir gumondor qo‘lga olingani aytilmoqda. Hodisa sabablari yuzasidan tergov harakatlari olib borilmoqda.
