Саида Мирзиёева кичик бизнес учун солиқ шароитлари енгиллаштирилгани ҳақида ёзди
Саида Мирзиёева бунинг самарасини, энг аввало, оилавий корхоналар, кафелар, дўконлар, хизмат кўрсатувчилар, мамлакат иқтисодиётини ҳаракатга келтираётган минглаб инсонлар ҳис қилишини таъкидлади.
26 май куни Президентнинг “Кичик бизнес субъектларининг ўсиши учун янада кулай иқтисодий ва маъмурий шарт-шароитлар яратиш тўғрисидаги” фармони имзоланди.
Ушбу фармон билан кичик бизнес учун соддалаштирилган солиқ режими чегараси 1 миллиард сўмдан 5 миллиард сўмга оширилиши белгиланди.
Мазкур янгилик ҳақида Президент администрацияси раҳбари Тelegram-каналида ёзди.
Саида Мирзиёева кичик бизнес учун яратилаётган янги енгилликлар ишбилармон доиралар томонидан илиқ кутиб олинаётганини таъкидлади. Унга кўра, тадбиркорлар узоқ вақтдан буён ҚҚС тўлашга ўтиш учун белгиланган 1 миллиард сўмлик чегара пастлиги, солиқ маъмуриятчилиги мураккаблиги, шунингдек, текширув ва ҳисоботларнинг кўплиги юзасидан мурожаат қилиб келаётган эди.
Қайд этилишича, мазкур тартиблар кўплаб тадбиркорларни бизнесни сунъий равишда бўлиб юритишга мажбур қилган.
“Бунинг самарасини, энг аввало, оилавий корхоналар, кафелар, дўконлар, хизмат кўрсатувчилар – бир сўз билан айтганда, ўзининг кундалик меҳнати билан мамлакатимиз иқтисодиётини ҳаракатга келтираётган минглаб инсонлар ҳис қилади”, — дея ёзди Мирзиёева.
