АҚШда юқори малакали мутахассислар учун “Грин карта” жараёни енгиллаштирилди
Эндиликда мутахассислар ариза топшириш учун мамлакатни тарк этишга мажбур бўлмайди.
АҚШ яшил карта (доимий яшаш ҳуқуқи) олиш учун ариза топшираётган юқори малакали мутахассислар бўйича талабларни юмшатди.
Bloomberg агентлигининг АҚШ Ички хавфсизлик вазирлигига таяниб хабар беришича, яшил карта олиш учун мурожаат қилаётган малакали мутахассисларга ариза топшириш мақсадида АҚШ ҳудудини тарк этиш талаби татбиқ этилмайди.
Қайд этилишича, вазирлик аввалроқ доимий резидентлик мақомини олишни истаган аксарият вақтинчалик чет эл фуқаролари яшил карта расмийлаштириш жараёнини давом эттириш учун ўз мамлакатларига қайтиши кераклигини билдирган эди.
Янги баёнотга кўра, малакали ва талабга жавоб берадиган аризачилар учун бундай чекловлар қўлланилмайди ҳамда ушбу ўзгаришлар муносиб номзодларнинг яшил карта олиш имкониятларини чекламайди. Шу билан бирга, айрим тоифадаги мурожаатчилар ҳужжатларни расмийлаштириш жараёнини АҚШнинг хориждаги дипломатик ваколатхоналари орқали бошлашлари талаб этилиши мумкин.
Таъкидланишича, мазкур ўзгаришлар амалдаги доимий қонуний яшаш ҳуқуқига эга бўлган шахсларга таъсир қилмайди.
