Нима сабабдан “Солиқ” иловасида айрим фойдаланувчиларга “шубҳали харидор” мақоми берилмоқда?

Солиқ қўмитаси “Солиқ” мобил иловасида айрим фойдаланувчиларга “шубҳали харидор” мақоми берилгани юзасидан расмий муносабат билдирди.

 

Маълум қилинишича, “Ижтимоий ҳимоя ягона реестри”га киритилган фуқароларни манзилли қўллаб-қувватлаш мақсадида айрим озиқ-овқат маҳсулотлари, дори воситалари ва тиббий хизматлар хариди учун тўланган қўшилган қиймат солиғини (ҚҚС) қайтариш тизими жорий этилган.

 

Қўмита маълумотларига кўра, ушбу тизимдан ноқонуний фойдаланиш ҳолатлари юзасидан ўтказилган дастлабки таҳлиллар давомида айрим корхоналар ва фуқаролар томонидан ҳақиқатда амалга оширилмаган харидлар учун фискал чеклар расмийлаштирилгани аниқланган.

 

Хусусан, Андижон вилоятида рўйхатдан ўтган 30 та корхона фаолияти юзасидан ўрганиш олиб борилган. Солиқ органлари маълумотига кўра, ушбу корхоналар орқали ижтимоий реестрдаги фуқаролар номига расмийлаштирилган чеклар асосида 217,3 миллиард сўм миқдорида кешбек тўланган. Мазкур ҳолатлар бўйича материаллар ҳуқуқни муҳофаза қилувчи органларга юборилган.

 

Шунингдек, Солиқ қўмитаси томонидан республика бўйича ижтимоий реестрдаги фуқароларга айрим маҳсулот ва хизматларни реализация қилган ҳамда фаолиятида шубҳали аломатлар аниқланган 649 та корхона ва фуқаролар ҳақидаги маълумотлар ҳам ваколатли органларга тақдим этилган.

 

Расмий маълумотларга кўра, 2025–2026 йиллар давомида мазкур тизим орқали 36,8 триллион сўмлик операциялар қайд этилган ва 771 мингдан ортиқ фуқарога 347,9 миллиард сўм кешбек тўлаб берилган.Солиқ қўмитаси билдиришича, тизимда 9 турдаги маҳсулотларни кирим қилмаган корхоналар билан боғлиқ операциялар бўйича 204,1 минг нафар фуқаро “шубҳали харидорлар реестри”га киритилган. Шу сабабли 2026 йил апрель ойи учун мўлжалланган 102,5 миллиард сўм миқдоридаги ижтимоий кешбек тўловлари вақтинча тўхтатилган.

 

Мазкур масала юзасидан қўмита томонидан Ижтимоий ҳимоя агентлигига тегишли мурожаатлар юборилгани қайд этилди.Солиқ қўмитаси фуқароларни фақат ўзлари амалга оширган харидлар учун берилган фискал чекларни мобил иловада рўйхатдан ўтказишга чақирди. 

 

Шунингдек, ижтимоий тармоқлар ёки бошқа манбалар орқали тарқатилаётган чеклардан фойдаланмаслик тавсия этилди.

 

Идора суриштирув ва таҳлил ишлари давом этаётган бир пайтда оммавий ахборот воситалари ҳамда блогерларни тасдиқланмаган маълумотларни тарқатмасликка ва касб этикаси меъёрларига риоя қилишга чақирди.