АҚШда 4,5 миллион долларлик товарларни ўғирлашда гумонланган ўзбекистонликлар ушланди
Гумонланувчилар омборлардан сигареталар, қимматбаҳо пишлоқлар, гўшт ва мис маҳсулотларини олиб чиқиб кетишган.
АҚШнинг Нью-Йорк шаҳрида 4,5 миллион долларлик товарларни ўғирлаш билан боғлиқ йирик фирибгарлик схемасида иштирок этганликда гумон қилинаётган бир гуруҳ ўзбекистонлик шахслар қўлга олинди. Бу ҳақда New York Post нашри хабар берди.
Тергов маълумотларига кўра, гумонланувчилар юк ташиш компаниялари тизимларига ноқонуний кириб, сохта ҳужжатлар ва буюртмалар орқали омборлардан қимматбаҳо маҳсулотларни олиб чиқиб кетган. Ўғирланган юклар орасида сигареталар, пишлоқ маҳсулотлари, гўшт ва мис каби товарлар бўлган.
Маълум қилинишича, фирибгарлик схемаси Нью-Джерси, Пенсильвания ва Виржиния штатларидаги омборларни қамраб олган. Кейинчалик ноқонуний йўл билан қўлга киритилган маҳсулотлар Нью-Йоркка олиб келиниб, сотилган.
Хабарларга кўра, гуруҳ аъзолари дабдабали ҳаёт кечирган: Брайтон-Бич ва Кони-Айлендда қиммат квартиралар ижарага олиб яшашган, қиммат машиналарда юришган ва тунги клубларда катта миқдорда нақд пул кўрсатиб юришган.
“Бу йигитлар ўзларини гўё барча мафия фильмларини томоша қилиб илҳомлангандай ва Америка орзусини Cosa Nostra услубида яшаш орқали амалга оширишга қарор қилишган”, деган ҳуқуқни муҳофаза қилиш органлари ходимларидан бири.
Суд материалларига кўра, жиноий гуруҳ етакчиси сифатида кўрилаётган шахс 11 июнга қадар ҳибсда қолдирилган. Яна икки гумонланувчи айбловларни рад этган ва суд назорати остида озод қилинган.
Шунингдек, мазкур иш доирасида яна бир неча шахс аввалроқ қўлга олинган бўлиб, тергов ҳаракатлари давом эттирилмоқда.
Аввалроқ, АҚШда ноқонуний пойга уюштирган ўзбекистонликлар қўлга олингани ҳақида хабар берилган эди.
