Саида Мирзиёева реконструкция қилинган қўғирчоқ театрига бoрди
Театрда олиб борилган реконструкция ишларининг биринчи босқичи якунлангач, маскан фаолияти яна жонланган.
Президент Администрацияси раҳбари Саида Мирзиёева ва Ижтимоий ҳимоя миллий агентлиги директорининг биринчи ўринбосари, Ўзбекистон Миллий Паралимпия қўмитаси раисининг биринчи ўринбосари, Wорлд Ақуатиcс Бюроси аъзоси Шаҳноза Мирзиёева Тошкент шаҳридаги Ўзбек Миллий қўғирчоқ театрига ташриф буюриб, Вилгелм Гауф эртаги асосида саҳналаштирилган “Халифа Лайлак” спектаклини томоша қилди.
Саида Мирзиёева ўзининг ижтимоий тармоқдаги саҳифасида ушбу асар инсон иродаси, ўзликни англаш ва мақсад сари интилиш ғояларини ўзида мужассам этган қадрли ҳамда севимли эртаклардан бири эканини таъкидлаган.
Қайд этилишича, театрда олиб борилган реконструкция ишларининг биринчи босқичи якунлангач, маскан фаолияти яна жонланган. Бугунги кунда бу ерда спектакллар намойиш этилиб, болаларнинг қувноқ овозлари янграмоқда, ота-оналар эса фарзандлари билан мазмунли ҳордиқ чиқармоқда.
Реконструкция жараёнида театрнинг тарихий қиёфаси ва ўзига хос меъморий руҳи асраб қолинган. Жумладан, “Эртаклар шаҳарчаси”, залнинг чўян эшиклари, карнай чалган созандалар сиймолари, ноёб шиша плафонлар, пештоқ композициялари ҳамда мозаикалар қайта тикланган.
Таъкидланишича, мамлакатдаги маданият масканларини модернизация қилиш, уларнинг моддий-техник базасини мустаҳкамлаш ва тарихий меросини асраб-авайлаш бўйича ишлар изчил давом эттирилмоқда. Бу эса аҳолининг, айниқса ёш авлоднинг маданий ҳаётдаги иштирокини янада кенгайтиришга хизмат қилмоқда.
Эслатиб ўтамиз, жорий йилнинг 30 апрел куни Президент Администрацияси раҳбари Тошкент шаҳридаги бир қатор театрлар фаолияти ва инфратузилмаси билан танишган эди. Ташриф давомида пойтахтдаги учта театр биноси кўздан кечирилиб, уларнинг моддий-техник базасини мустаҳкамлаш, таъмирталаб обектларни реконструкция қилиш ҳамда замонавий жиҳозлар билан таъминлаш масалалари муҳокама қилинган.
