Эрон терма жамоасига АҚШга фақат ўйин кунлари киришга рухсат берилади
Футболчилар ўйин ўтказилган куннинг ўзида мамлакатни тарк этиши шарт бўлади.
Эрон миллий футбол терма жамоаси футболчиларига Жаҳон чемпионати давомида АҚШ ҳудудига фақат ўйин ўтказиладиган кунлари киришга рухсат берилади. Бу ҳақда Эроннинг Мексикадаги элчиси Абулфазл Пасандидех маълум қилди, дея хабар бермоқда aNews.
Элчининг сўзларига кўра, футболчилар АҚШга эрталаб кириши мумкин, бироқ ўйин ўтказилган куннинг ўзида мамлакатни тарк этиши шарт бўлади.
Пасандидехнинг Тихуана шаҳрида журналистларга маълум қилишича, Эрон футбол федерациясининг 15 нафар вакили Жаҳон чемпионати учун зарур бўлган АҚШ визаларини ҳали олмаган. Шу билан бирга, улар Эроннинг 15 июнь куни Янги Зеландия терма жамоасига қарши илк учрашувигача виза олишига умид қилинмоқда.
Эрон ОАВлари хабарига кўра, виза олмаганлар орасида федерация президенти Меҳди Тож ҳамда жамоанинг логистика бўйича менежери ҳам бор.
Қайд этилишича, Эрон терма жамоасининг барча футболчилари Мексикага кириш учун виза олган. 11 июндан 19 июлгача АҚШ, Канада ва Мексикада бўлиб ўтадиган Жаҳон чемпионатида Эроннинг гуруҳ босқичидаги барча ўйинлари АҚШ ҳудудида ўтказилади.
Февраль ойида Эрон ва АҚШ ўртасида уруш бошланганидан сўнг, Эрон терма жамоасининг турнир учун АҚШга кириши масаласи юзасидан хавотирлар пайдо бўлган эди.
Шу сабабли Эрон футбол федерацияси май ойида жамоанинг ўқув-машғулот йиғинини АҚШнинг Аризона штатидан Мексиканинг Тихуана шаҳрига кўчиришга қарор қилган.
Эрон терма жамоаси 15 июнь куни Лос-Анжелесда Янги Зеландия, 21 июнь куни эса Белгия терма жамоасига қарши майдонга тушади. Жамоанинг гуруҳ босқичидаги сўнгги учрашуви 26 июнь куни Сиэтл шаҳрида Миср терма жамоасига қарши бўлиб ўтади.
