Ўзбекистонда қурилиш компаниялари устидан шикоятлар кескин ошди

 

Ўзбекистонда қурилиш соҳаси билан боғлиқ мурожаатлар сони сезиларли даражада кўпайди. Бу ҳақда Рақобат қўмитаси маълум қилди.

 

Қўмита маълумотларига кўра, 2025 йил давомида қурилиш соҳасидаги қонунбузилишлар юзасидан 1 706 та мурожаат келиб тушган бўлса, 2026-йилнинг биринчи чорагидаёқ бундай мурожаатлар сони қарийб мингтагача етган.

 

Мурожаатларда асосан қурилиш ишларининг сифациз бажарилиши, кўрсатилмаган хизматлар учун ҳақ ундирилиши, шартнома мажбуриятларига риоя қилинмаслиги, уй-жойларнинг белгиланган муддатда топширилмаслиги ҳамда зарур рухсатномаларсиз олдиндан тўлов йиғилиши билан боғлиқ ҳолатлар қайд этилган.

 

Шунингдек, фуқаролар томонидан техник талабларга жавоб бермайдиган қурилиш материалларидан фойдаланилиши, рекламаларда ваъда қилинган лойиҳаларнинг амалда бажарилмагани юзасидан ҳам кўплаб эътирозлар билдирилган.

 

Шу муносабат билан Рақобат қўмитаси фуқароларни ҳали қурилиши якунланмаган уй-жойларга маблағ киритиш ёки янги қурилган кўп қаватли уйлардан хонадон харид қилишдан аввал барча ҳужжатлар ва шартнома бандларини синчковлик билан ўрганишга чақирди.

 

Хусусан, қурувчи ва харидорнинг ҳуқуқ ҳамда мажбуриятлари, обектни топшириш муддатлари, шунингдек, ушбу муддатлар бузилганда томонларнинг жавобгарлиги алоҳида эътибор талаб қилиши таъкидланган.

 

Қўмита қурилиш ташкилотларини амалдаги қонунчилик талабларига қатъий риоя қилишга чақириб, қонунбузилиш ҳолатлари аниқланган тақдирда тегишли таъсир чоралари қўлланилишини эслатган.

 

Эслатиб ўтамиз, аввалроқ Президент фармонига мувофиқ, 2026 йил октябр ойидан бошлаб қурилиш жараёнида коррупсиявий ҳолатларни барвақт аниқлаш мақсадида “сирли мижоз” механизми жорий этилиши хабар қилинган эди. Шунингдек, 2026 йил сентябрдан ер участкаларига оид ҳуқуқлар юзага келган пайтдан бошлаб қурилиш ишларининг қонунчилик талабларига мувофиқлиги бўйича огоҳлантириш тизими ҳам ишга туширилади.