Янгиланган FIFA рейтингида Ўзбекистон нечанчи ўринда?
"Оқ бўрилар" мундиал олдидан ўтказилган ўртоқлик учрашувларидаги мағлубиятидан сўнг FIFA рейтингида 6,47 очко йўқотганди.
FIFA 11 июнь куни миллий терма жамоаларнинг янгиланган рейтингини эълон қилди.
Янгиланган жадвалга кўра, Аргентина миллий терма жамоаси биринчи ўриндан жой олди. Иккинчи ўринни Испания, учинчи ўринни эса ўтган ой биринчи ўринда бўлган Франция эгаллади.
Мазкур рейтингда Ўзбекистон миллий терма жамоаси 1458,73 очко билан 50-ўринни эгаллади. Бу кўрсаткич бўйича Фабио Каннаваро шогирдлари Осиё терма жамоалари орасида 5- энг яхши кўрсаткични қайд этмоқда.
Қитъа рейтингида Ўзбекистондан юқорида Япония (18-ўрин), Эрон (20), Жанубий Корея (25) ва Австралия (27) терма жамоалари жой олган.
Маълумот ўрнида, "Оқ бўрилар" мундиал олдидан ўтказилган ўртоқлик учрашувларида Канада ва Нидерландияга мағлуб бўлди ва FIFA рейтингида 6,47 очко йўқотди.
Шунга қарамай, бошқа терма жамоаларнинг ҳам очко йўқотиши сабабли Ўзбекистон рейтиндаги ўрнини сақлаб қолди.
