Тошкентдаги кўчалардан бирига Мустафо Камол Отатурк номи берилади
Янги ном бериладиган кўча “Ўзбек–Турк дўстлиги” хиёбони яқинида жойлашган.
Тошкент шаҳрида жойлашган кўчалардан бирига Туркия Республикасининг асосчиси Мустафо Камол Отатурк номи берилади.
Бу ҳақдаги қарор 15 июнь куни Президент томонидан имзоланди.
Унга кўра, Яшнобод туманида барпо этилаётган “Ўзбек-турк дўстлиги” хиёбонига туташ бўлган Абдулла Қодирий кўчасининг маълум бир қисми (Истиқлол, Фарғона йўли ва Нукус кўчалари кесишмасидан Абдулла Қодирий кўчаси ва Махтумқули шоҳкўчаси кесишмасигача) Мустафо Камол Отатурк номи билан аталади.
Мазкур қарор Ўзбекистон ва Туркия ўртасидаги дўстлик ва ҳамкорлик муносабатларини янада мустаҳкамлаш, тарихий шахслар хотирасини эъзозлаш ва халқаро алоқаларни ривожлантиришга хизмат қилиши таъкидланмоқда.
Эслатиб ўтамиз, аввалроқ Туркиянинг Ҳатай вилоятининг Арсуз туманида Ўзбекистон томонидан бунёд этилган турар-жой мажмуаси негизида ташкил этилган “Ўзбекистон маҳалласи”, Шавкат Мирзиёев булвари ҳамда Тошкент ва Самарқанд кўчаларининг тантанали очилиш маросими бўлиб ўтгани хабар қилинган эди.
