Музработ тумани ҳокимига ҳайфсан берилди
Ҳоким фермерларга нисбатан ҳақоратли муносабат билдирган.
Сурхондарё вилояти Музработ тумани ҳокими Абдулла Маматқуловга нисбатан ҳайфсан интизомий жазоси қўлланилди. Бу ҳақда Коррупцияга қарши курашиш агентлиги матбуот хизмати маълум қилди.
Аввалроқ ижтимоий тармоқларда туман ҳокимининг ғалла топшириш режасини бажармаётган фермерлар билан ўтказилган йиғилишдаги мурожаати акс этган видеолавҳалар кенг муҳокамаларга сабаб бўлган эди. Унда ҳоким томонидан фермерларга нисбатан ҳақоратли ва таҳқирловчи муносабат билдирилгани жамоатчилик эътиборини тортганди.
Ҳолат юзасидан ўтказилган ўрганишлар давомида давлат хизматчисининг одоб-ахлоқ қоидалари талабларига зид хатти-ҳаракатларга йўл қўйилгани аниқланган.
Амалдаги қонунчиликка кўра, давлат фуқаролик хизматчилари хизмат вазифаларини виждонан бажариши, давлат органлари ва ташкилотларининг обрў-эътиборига путур етказиши мумкин бўлган хатти-ҳаракатлардан тийилиши, шунингдек, фуқаролар билан муносабатларда хушмуомалалик, ҳурмат ва профессионаллик тамойилларига қатъий амал қилиши лозим.
Коррупцияга қарши курашиш агентлиги ўз ваколатлари доирасида мазкур ҳолат юзасидан Сурхондарё вилояти ҳокимлигига хизмат текшируви ўтказиш ҳамда қонунчиликда белгиланган тартибда ҳуқуқий баҳо бериш бўйича тақдимнома киритган.
Тақдимнома натижалари асосида Музработ тумани ҳокими Абдулла Маматқуловга нисбатан ҳайфсан интизомий жазоси қўлланилди.
Агентлик маълумотига кўра, давлат хизматчилари томонидан одоб-ахлоқ қоидаларига риоя этилишини таъминлаш, давлат хизматида юксак касбий ва ахлоқий стандартларни қарор топтириш ҳамда қонун бузилиши ҳолатларига нисбатан жавобгарликнинг муқаррарлигини таъминлаш борасидаги ишлар изчил давом эттирилади.
Эслатиб ўтамиз, аввалроқ Қарши шаҳри ҳокимининг биринчи ўринбосари Нурбек Турдиевнинг ходимларни дам олиш кунлари мажбурий меҳнатга жалб қилгани ва уларга нисбатан ҳақоратли муносабатда бўлгани юзасидан ҳам тегишли ўрганишлар бошланган эди.
