Тошкентда болаларга зўравонлик қилинган хусусий боғча ёпилиши мумкин
Боғчада болаларнинг оғзига мато тиқилгани ва қўли эшик билан қисилгани акс этган видеолар ортидан жиноят иши қўзғатилди.
Тошкент шаҳар мактабгача ва мактаб таълими бошқармаси Rayyan Kids Land нодавлат таълим ташкилоти фаолияти юзасидан расмий маълумот берди.
Қайд этилишича, ўтказилган ўрганишлар давомида мазкур таълим ташкилоти томонидан лицензия талаблари ва шартларининг 6 та ҳолатда қўпол равишда бузилгани аниқланган. Жумладан, 24 июнь куни тарбиячи A.Г. томонидан тарбияланувчилардан бирига нисбатан жисмоний ва руҳий зўравонлик қилингани ҳам ушбу қоидабузарликлар қаторига киритилган.
Амалдаги қонунчиликка кўра, нодавлат таълим ташкилоти томонидан лицензия талаблари бир маротаба қўпол равишда бузилиб, бу фуқароларнинг ҳаёти ва соғлиғига зарар етказишига сабаб бўлган тақдирда, лицензияни бекор қилишга асос бўлиши мумкин.
Шу муносабат билан Мактабгача ва мактаб таълими вазирлиги томонидан Rayyan Kids Land'га берилган лицензияни бекор қилиш юзасидан Тошкент туманлараро иқтисодий судига ариза киритилди.
Эслатиб ўтамиз, Учтепа туманида жойлашган ушбу хусусий боғчада тарбиячиларнинг болаларга нисбатан номақбул муносабатда бўлаётгани акс этган видеолар ижтимоий тармоқларда кенг тарқалган эди. Видеоларда айрим болаларга тазйиқ ўтказилгани, бир боланинг оғзига мато тиқилгани ва бошқасининг қўли эшик билан қисиб қўйилгани акс этган.
Ҳолат юзасидан Жиноят кодексининг 110-моддаси (қийнаш) аломатлари билан жиноят иши қўзғатилган. Айрим тарбияланувчиларнинг олган тан жароҳатлари бўйича суд-тиббий экспертиза тайинланган.
