Тошкентда Миллий гвардия ходими каналда чўкаётган аёлни қутқаришга уриниб, ҳалок бўлди
Кучли сув оқими сабаб аёлни қутқаришнинг имкони бўлмаган ва аёл ҳам сувга чўкиб кетган.
Ижтимоий тармоқларда Тошкент шаҳридаги "Хотира хиёбони" ёдгорлик мажмуаси яқинидан оқиб ўтувчи каналда аёлни қутқаришга уринган Миллий гвардия ҳарбий хизматчиси ҳалок бўлгани акс этган видеолар тарқалди.
Миллий гвардия Тошкент шаҳар бошқармаси ахборот хизматининг маълум қилишича, ҳарбий хизматчилар канал бўйлаб оқиб кетаётган аёлни кўриб қолган ва унинг ҳаётини сақлаб қолиш мақсадида зудлик билан қутқарув чораларини кўрган.
Ҳарбий хизматчилардан бири сувга тушиб, аёлни қутқаришга уринган. Бироқ каналнинг кучли оқими туфайли фуқарони сақлаб қолишнинг имкони бўлмаган ва аёл сувга чўкиб кетган.
Маълум қилинишича, ўзини каналга ташлаган аёл шу куннинг ўзида қидирув ишлари натижасида топилган ва унинг жасади яқинларига топширилган.
Қутқарув вақтида кучли сув оқими ва гирдоб таъсирида қолган Миллий гвардия ҳарбий хизматчиси эса бедарак йўқолган. Унинг жасади қидирув-қутқарув хизматлари ҳамда ҳамкор ташкилотлар иштирокида ўтказилган махсус қидирув ишлари натижасида топилди.
Дастлабки маълумотларга кўра, ҳалок бўлган ҳарбий хизматчи 2005 йилда туғилган бўлиб, яқин кунларда унинг тўйи бўлиши режалаштирилган эди.
