АҚШ ва Эрон ўртасидаги техник музокаралар давом этмоқда — Reuters
Вашингтон Теҳронни меморандум шартларига риоя қилмаётганликда айбламоқда.
АҚШ ва Эрон ўртасидаги техник даражадаги маслаҳатлашувлар давом этмоқда. Бу ҳақда Reuters агентлиги АҚШ маъмуриятидаги манбага таяниб хабар берди.
Агентлик маълумотларига кўра, Вашингтон Эрон билан мавжуд зиддиятларни дипломатик йўл билан ҳал этиш тарафдори бўлиб қолмоқда ва шу мақсадда мутахассислар даражасидаги музокаралар давом эттирилмоқда.
Шу билан бирга, АҚШ маъмурияти Теҳрон ўзаро англашув меморандуми доирасида зиммасига олган айрим мажбуриятларни тўлиқ бажармаётганини таъкидламоқда. Хусусан, Вашингтон Эрон кучларининг Ҳормуз бўғозида кемаларга ўқ узишини меморандум шартларига зид ҳаракат сифатида баҳолаган.
Эслатиб ўтамиз, АҚШ ва Исроил жорий йил 28 февраль куни Эронга қарши ҳарбий амалиётларни бошлаган эди. Орадан бир неча ой ўтиб, томонлар Ливанни ҳам қамраб олган барча йўналишларда ҳарбий ҳаракатларни тўхтатишни назарда тутувчи ўзаро англашув меморандумини имзолаган.
Мазкур ҳужжатни амалга ошириш юзасидан Қатар ва Покистон воситачилигида Швейтсариянинг Бюргенсток шаҳрида АҚШ ҳамда Эрон вакиллари ўртасида музокаралар ўтказилган. Музокараларнинг биринчи босқичи якунида томонлар техник маслаҳатлашувларни давом эттириш ва келгусидаги мулоқот учун зарур асос яратилганини маълум қилган эди.
Бироқ 8 июль куни АҚШ Эронни Ҳормуз бўғози бўйича эришилган келишувларни бузганликда айблаб, унинг ҳудудидаги бир қатор объектларга зарбалар берган. Реутерс манбасига кўра, ҳарбий кескинлик сақланиб қолаётганига қарамай, Вашингтон дипломатик мулоқотни давом эттириш ниятидан воз кечмаган.
