Эрон АҚШ зарбаларидан сўнг Баҳрайн ва Кувайтдаги нишонларга ҳужум қилди
Аввалроқ АҚШ Эрон ҳудудидаги 80 дан ортиқ ҳарбий нишонга зарбалар берган эди.
Эрон АҚШнинг янги ҳаво зарбаларига жавобан Баҳрайн ва Кувайтдаги АҚШ ҳарбий объектларига ракета ҳамда дронлар ёрдамида ҳужум уюштирди. Бу ҳақда Эрон Ислом инқилоби қўриқчилари корпуси ва АҚШ расмийлари маълум қилди дейди Reuters.
АҚШ Марказий қўмондонлиги маълумотига кўра, 8 июль куни Эрон ҳудудидаги 80 дан ортиқ ҳарбий нишонга зарбалар берилган. Ҳужумлар ҳаво ҳужумидан мудофаа тизимлари, қўмондонлик марказлари, қирғоқ радар тизимлари, кемаларга қарши ракета мажмуалари ҳамда Эрон Ислом инқилоби қўриқчилари корпусига тегишли 60 дан ортиқ тезкор катерни нишонга олган.
Вашингтон бу амалиётни Ҳормуз бўғози яқинида учта тижорат кемасига уюштирилган ҳужумларга жавоб сифатида изоҳлади. Шунингдек, АҚШ Эроннинг халқаро бозорда нефть сотишига имкон берган лицензияни ҳам бекор қилди.
Шундан кўп ўтмай, Эрон Ислом инқилоби қўриқчилари корпуси Баҳрайн ва Кувайтдаги АҚШ ҳарбий объектларига қарши "ракета ва дронлардан иборат қўшма операция" ўтказилганини маълум қилди. Эрон томони ҳужум давомида АҚШга тегишли МҚ-9 русумли учувчисиз аппарат уриб туширилганини ҳам даъво қилмоқда.
Ҳужум вақтида Баҳрайн ва Кувайтда ҳаво ҳужуми сиреналари янграган. Кувайт расмийлари мамлакат ҳаво ҳужумидан мудофаа тизимлари бир нечта ракета ва дронларни тутиб қолганини билдирди. Баҳрайнда ҳам мудофаа тизимлари ишга туширилгани маълум қилинди. АҚШ томони дастлабки маълумотларга кўра, зарбалар оқибатида жиддий талафот қайд этилмаганини билдирган.
Сўнгги воқеалар АҚШ ва Эрон ўртасида июнь ойида эришилган сулҳни яна хавф остида қолдирди. Теҳрон АҚШнинг янги зарбаларини келишувнинг бузилиши сифатида баҳолаб, Вашингтонни кескин қоралади. АҚШ эса Эронни Ҳормуз бўғозида халқаро кемаларга ҳужумларни давом эттираётганликда айбламоқда.
Кескинлик фонида жаҳон бозорида нефть нархлари қарийб 3 фоизга ошди. Инвесторлар Форс кўрфази минтақасидаги можаро янада кенгайиши ва дунёнинг энг муҳим денгиз савдо йўлларидан бири ҳисобланган Ҳормуз бўғозида юк ташиш издан чиқишидан хавотир билдирмоқда.
АҚШ ва Эрон ўртасидаги музокаралар тақдири ҳам мавҳумлигича қолмоқда. Томонлар бир-бирини кескинликни кучайтиришда айблаётган бир пайтда, минтақадаги хавфсизлик билан боғлиқ вазият янада мураккаблашмоқда.
