Жазирама кунларда очиқ ҳаводаги ишларни 11:00–16:00 оралиғида тўхтатиш тавсия этилди
Меҳнат инспекцияси жазирама шароитида иш берувчилар учун мажбурий талабларни эълон қилди.
Меҳнат инспекцияси жазирама об-ҳаво шароитида иш берувчилар бажариши шарт бўлган талабларни эълон қилди.
Қайд этилишича, юқори ҳарорат шароитида очиқ ҳавода меҳнат қилаётган ходимларда иссиқ уриши, сувсизланиш, ҳушдан кетиш ҳамда юрак-қон томир касалликлари хавфи ортади. Шу сабабли иш берувчилар меҳнат шароитларини жазирама об-ҳавога мослаштириши лозим.
Хусусан, соат 11:00 дан 16:00 гача очиқ ҳаводаги ишларни қисқартириш ёки заруратга кўра вақтинча тўхтатиш, оғир жисмоний меҳнатни чеклаш тавсия этилган.
Шунингдек, иш берувчилар ходимларни тоза ичимлик суви, сояли ёки совитиладиган дам олиш жойлари ҳамда енгил, ҳаво ўтказувчи ва иссиқдан ҳимоя қилувчи махсус кийимлар билан таъминлаши шарт.
Бундан ташқари, иссиқ шароитда ишловчи ходимлар тиббий кўрикдан ўтган бўлиши, уларга иссиқ уриши белгилари бўйича тушунтириш ишлари олиб борилиши лозим. Ходимнинг соғлиғи ёмонлашган тақдирда эса у зудлик билан салқин жойга олиб чиқилиб, биринчи тиббий ёрдам кўрсатилиши талаб этилади.
Меҳнат инспекцияси ушбу талабларга риоя этиш тавсия эмас, балки иш берувчиларнинг қонуний мажбурияти эканини алоҳида таъкидлади.
Аввалроқ аномал иссиқ фонида Ўзбекистонда электр энергияси истеъмоли бўйича янги рекорд қайд этилгани хабар қилинган эди.
