"Poytaxt Parking" ХДП танқидига расмий муносабат билдирди

 
"Poytaxt Parking" компанияси Ўзбекистон Халқ демократик партиясининг пулли автотураргоҳлар тизими юзасидан билдирган муносабатига расмий жавоб эълон қилди. Унда компания фаолияти атрофида юзага келаётган айрим нотўғри талқинларга изоҳ берилган.

 
Компания баёнотида таъкидланишича, "Poytaxt Parking" шаҳар ҳудудлари ёки автотураргоҳларнинг эгаси эмас, балки Тошкент шаҳри билан тузилган шартнома асосида хизмат кўрсатувчи оператор ҳисобланади. Унинг вазифаси пулли автотураргоҳларни ташкил этиш, уларга техник хизмат кўрсатиш, йўл белгилари ва чизиқларини ўрнатиш, шунингдек, ҳайдовчилар учун қулай тўлов тизимини яратишдан иборат.

 
Шунингдек, компания маъмурий жарималарни қўллаш ёки ундириш ваколатига эга эмаслигини алоҳида қайд этди. Баёнотга кўра, маъмурий жавобгарликни белгилаш ва қўллаш фақат ваколатли давлат органлари ваколатига киради. "Poytaxt Parking" жарималар жорий этилиши ташаббускори эмаслиги ва бундай қарорларни қабул қилиш жараёнида иштирок этмаслигини билдирди.

 
Компания пулли автотураргоҳлар учун ундириладиган тўловларни йиғиш ва уларни шартномада белгиланган тартибда Тошкент шаҳри буджетига ўтказишни ўзининг асосий вазифаси сифатида кўрсатди. Баёнотда ушбу маблағлар шаҳар буджетини тўлдириш ва ижтимоий лойиҳаларни молиялаштириш манбаларидан бири экани таъкидланган.

 
"Poytaxt Parking" очиқлик ва шаффофлик тамойилларини қўллаб-қувватлашини ҳам маълум қилди. Компания фойдаланувчилар сони, йиғилган тўловлар ҳажми, маблағларнинг буджетга ўтказилиши ҳамда ўз мажбуриятлари бажарилиши бўйича маълумотларни эълон қилишга тайёр эканини билдирди.

 
Баёнот якунида компания ўзининг асосий мақсади ҳайдовчиларни жазолаш эмас, балки шаҳар марказида тартиб ва қулайликни таъминлаш эканини қайд этди. Компания фикрича, пулли автотураргоҳлар тизими тартибсиз тўхташлар ва тирбандликларни камайтиришга хизмат қилади ҳамда пиёдалар ва ҳайдовчилар учун қулай шаҳар муҳитини яратишга ёрдам беради.

 
"Poytaxt Parking" Ўзбекистон Халқ демократик партияси ва жамоатчилик билан очиқ мулоқот қилиш, зарур маълумотларни тақдим этиш ҳамда пойтахт аҳолиси манфаатлари йўлида ҳамкорлик қилишга тайёрлигини билдирди.