АҚШда ҳибсга олинган ўзбекистонлик юк машина ҳайдовчиси гаров эвазига озод қилинди
21 ёшли футболчи ҳалок бўлган ЙТҲ бўйича айбланаётган ўзбекистонлик электрон кузатув мосламаси тақиш шарти билан қўйиб юборилди.
АҚШнинг Огаё штатида ўлим билан якунланган йўл-транспорт ҳодисаси бўйича айбланаётган Ўзбекистон фуқароси Беҳзод Асроров суд қарори билан гаров эвазига ҳибсдан чиқарилди. Шу билан бирга, у электрон кузатув мосламаси тақиш шарти билан расмийлар назоратида қолади.
Суд мажлиси давомида Асроров таржимон ёрдамида иштирок этган. Ҳимоячи унинг АҚШдаги транспорт компанияларидан бирида қарийб бир йил давомида ҳайдовчи бўлиб ишлаганини маълум қилган.
Тергов маълумотларига кўра, ЙТҲ оқибатида 21 ёшли коллеж талабаси ва футболчи Тобиас Форсайт ҳалок бўлган. Прокуратура ҳодисадан сўнг ҳайдовчи юк машинасидаги видеокамерани яширишга уринганини ҳам даъво қилмоқда. Шу сабаб унга далилларни яшириш ёки йўқ қилишга уриниш бўйича ҳам айблов қўйилган.
Ҳуқуқ-тартибот идоралари ҳозирда токсикологик экспертиза натижалари ҳамда ҳодиса тафсилотлари бўйича қўшимча текширувларни кутмоқда. Мазкур жараён якунига кўра, Асроровга нисбатан қўшимча айбловлар эълон қилиниши мумкин.
Маълум қилинишича, Беҳзод Асроров 2024 йилда "Green Card" дастури орқали АҚШга кўчиб борган ҳамда тижорат юк машиналарини бошқариш ҳуқуқини берувчи CDL лицензиясини олган. Бироқ суд материалларига кўра, у инглиз тилини билмагани сабабли полиция ходимлари билан Google Транслате орқали мулоқот қилган.
Мазкур ҳодисадан сўнг АҚШда тижорат ҳайдовчиларини тайёрлаш ва чет эллик фуқароларга CDL лицензиялари бериш тартибини кучайтириш юзасидан баҳс-мунозаралар яна авж олган. АҚШ транспорт вазири Шон Даффи инглиз тилини етарли даражада билмайдиган шахсларга юк машиналарини бошқаришга рухсат берилмаслиги кераклигини таъкидлаган.
