Покистонда кучли ёмғирлар оқибатида бир кунда 9 киши ҳалок бўлди
Муссон ёғинлари қурбонлар ва вайронагарчиликларга сабаб бўлди.
Покистонда кучли ёмғир ва у билан боғлиқ табиий ҳодисалар оқибатида сўнгги 24 соат ичида камида 9 киши ҳалок бўлди. Бу ҳақда мамлакатнинг Табиий офатларни бошқариш миллий бошқармаси маълум қилди.
Маълумотларга кўра, қурбонларнинг олти нафари Хайбер Пахтунхва вилоятида, яна уч нафари эса Азад Жамму ва Кашмир ҳудудида қайд этилган.
Шунингдек, кучли ёғингарчилик ва сув тошқинлари оқибатида 28 та турар жой уйи вайрон бўлган.
Покистонда муссон мавсуми июль ойида бошланиб, одатда сентябргача давом этади. Ушбу давр қишлоқ хўжалиги учун муҳим бўлган ёғингарчиликларни олиб келсада, кўпинча сув тошқинлари, кўчкилар ва бошқа табиий офатларга ҳам сабаб бўлади.
Масъул идоралар аҳолини эҳтиёт чораларига қатъий риоя қилишга чақириб, зарарланган ҳудудларда қутқарув ва тиклаш ишлари давом этаётганини билдирди.
Эслатиб ўтамиз, аввалроқ Афғонистондаги сув тошқинлари оқибатида 20 киши ҳалок бўлгани ҳақида хабар қилинган эди.
