Ўзбекистонда электр энергияси истеъмоли рекорди янгиланди
Электр энергияси истеъмоли ва ишлаб чиқариш бўйича тарихий энг юқори кўрсаткич қайд этилди.
Ўзбекистон ягона электр энергетика тизимида 20 июль куни электр энергияси истеъмоли ва ишлаб чиқариш бўйича тарихдаги энг юқори кўрсаткич қайд этилди.
Энергетика вазирлиги маълумотига кўра, соат 17:22 ҳолатига республика бўйича электр энергияси истеъмоли 14 ГВт, ишлаб чиқариш ҳажми эса 14,2 ГВтни ташкил этган. Қайд этилишича, бу мамлакат электр энергетикаси тарихидаги энг юқори кўрсаткич ҳисобланади.
Эслатиб ўтамиз, аввалроқ, 17 июль куни ҳам Ўзбекистон ягона энергетика тизимида электр энергияси истеъмоли ва ишлаб чиқариш бўйича навбатдаги рекорд қайд этилганди. Ўшанда суткалик электр энергияси истеъмоли 293,4 миллион кВт·соатни ташкил этиб, ўтган йил ёзги мавсумидаги энг юқори кўрсаткичдан 20,8 миллион кВт·соатга ёки 7,6 фоизга юқори бўлгани маълум қилинган эди.
Энергетика вазирлигига кўра, электр тармоқларидаги юклама ва ускуналарнинг техник ҳолати диспетчерлик хизматлари томонидан реал вақт режимида узлуксиз назорат қилинмоқда. Зарурат туғилганда юкламани қайта тақсимлаш ҳамда бошқа тезкор чоралар кўрилиб, энерготизимнинг барқарор ишлаши таъминланмоқда.
