Аномал иссиқ сабаб ёпилган боғча ходимларига иш ҳақи тўлиқ тўланади
Боғчага бормаган кунлар учун ота-оналардан тўлов ундирилмайди, олдиндан тўланган маблағ эса кейинги ой ҳисобига ўтказилади.
Ўзбекистонда аномал иссиқ сабаб вақтинча ёпилган давлат мактабгача таълим ташкилотлари ходимларига иш ҳақи тўлиқ тўланади. Бу ҳақда Мактабгача ва мактаб таълими вазирлигининг ҳудудий бошқармаларга юборган кўрсатмасига таяниб хабар қилинди.
Кўрсатмага кўра, Қорақалпоғистон Республикаси Мактабгача ва мактаб таълими вазирлиги, Тошкент шаҳар ҳамда барча вилоятлар мактабгача ва мактаб таълими бошқармаларига аномал иссиқ об-ҳаво туфайли бекор туриб қолинган давр учун ходимларга иш ҳақи тўлиқ тўланишини таъминлаш топширилган.
Шунингдек, боғчага келмаган кунлар учун ота-оналардан тўлов ундирилмайди. Агар ота-она тўлови олдиндан амалга оширилган бўлса, бола қатнашмаган кунлар учун тўланган маблағ кейинги ой тўловидан чегириб қолинади.
Вазирлик қайд этишича, ота-оналар тўловлари ҳамда қонунчиликда белгиланган бошқа ҳисоб-китобларни амалга оширишда болаларнинг электрон давомат маълумотлари ягона асос ҳисобланади.
Эслатиб ўтамиз, аномал иссиқ туфайли июль ойида Қорақалпоғистон, Хоразм, Навоий, Бухоро, Фарғона ва Тошкент вилоятларидаги қатор давлат мактабгача таълим ташкилотлари бир неча кун муддатга фаолиятини тўхтатган эди.
