Россия чеклов қўйган Ўзбекистоннинг 5 та экспортчи корхонаси текширувдан ўтказилмоқда

 

Россия томонидан вақтинчалик чеклов жорий этилган Ўзбекистоннинг бешта экспортчи корхонаси фаолияти юзасидан текширув бошланди.

 

Озиқ-овқат маҳсулотлари хавфсизлиги қўмитаси маълум қилишича, Россия Федерациясининг Ветеринария ва фитосанитария назорати бўйича федерал хизмати (Росселхознадзор) фитосанитария талабларини мунтазам бузган бешта экспортчи корхонага нисбатан 2026 йил 23 июлдан бошлаб карантин остидаги маҳсулотларни Россия ҳудудига олиб киришга вақтинчалик чеклов жорий этган.

 

Россия томони тақдим этган расмий маълумотларга кўра, фитосанитария талабларини бузиш ҳолатлари:

• Хоразм вилояти Янгибозор туманидаги 1 та корхонада — 15 та;

• Сурхондарё вилояти Узун туманидаги 1 та корхонада — 11 та;

• Навоий вилояти Қизилтепа туманидаги 2 та корхонада — 15 та;

• Бухоро вилояти Ғиждувон туманидаги 1 та корхонада — 7 та ҳолатда аниқланган.

 

Қўмита томонидан ҳар бир корхона кесимида маҳсулотни етиштириш, сақлаш, саралаш ва экспортга тайёрлаш жараёнлари, фитосанитария назорати ҳамда маҳсулот кузатувчанлиги (traceability) тизими ўрганилмоқда.

 

Шунингдек, миллий қонунчилик ва халқаро фитосанитария талаблари асосида зарур ҳуқуқий ҳамда ташкилий чоралар кўрилиши, Росселхознадзор билан ҳамкорликда аниқланган камчиликларни бартараф этиш ва чекловларни қисқа муддатда бекор қилиш бўйича ишлар давом эттирилиши маълум қилинди.

 

Қўмита мазкур чекловлар фақат фитосанитария талаблари бузилгани қайд этилган ушбу бешта корхонага нисбатан қўлланаётганини, қолган маҳаллий экспортчилар фаолияти эса одатдаги тартибда давом этаётганини таъкидлади.