Венесуэладаги зилзила зарари 20 миллиард долларга яқинлашди
Тезкор тикланиш чоралари кўрилмаса, мамлакатни қайта тиклаш 10 йилдан ортиқ вақт олиши мумкин
Жаҳон банки Венесуэлада 24 июнь куни содир бўлган кучли зилзилалар оқибатида етказилган моддий зарар қарийб 19,6 миллиард долларга етганини маълум қилди.
Мазкур маълумот Жаҳон банкининг Global Rapid Damage Estimation (GRADE) дастлабки баҳолаш ҳисоботида келтирилган. Ҳисобот Венесуэла ҳукумати ва халқаро ҳамкорларга тикланиш ишлари кўламини аниқлаш ҳамда устувор йўналишларни белгилаш учун тайёрланган.
Ҳисоб-китобларга кўра, умумий зарарнинг 47 фоизи турар-жой бинолари, 27 фоизи инфратузилма, 26 фоизи эса турар жой бўлмаган объектлар, жумладан тижорат ва саноат иншоотларига тўғри келган. Энг катта талафот Ла Гуайра штати ва Пойтахт округи ҳудудларида қайд этилган.
Жаҳон банки мутахассислари тикланиш суръати мамлакатнинг иқтисодий ва ижтимоий тикланишида ҳал қилувчи омил бўлишини таъкидлаган. Ҳисоботга кўра, қўшимча инвестициялар жалб этилмаса, инфратузилмани тўлиқ тиклаш 10 йилдан ортиқ вақт олиши ва иқтисодий фаолликка узоқ муддатли салбий таъсир кўрсатиши мумкин.
Эслатиб ўтамиз, 24 июнь куни Венесуэла шимолида содир бўлган 7,2 ва 7,5 магнитудали икки зилзила содир бўлган эди. Табиий офат оқибатида минглаб бинолар зарар кўрган, 5 398 киши ҳалок бўлган, ўн минглаб аҳоли эса вақтинчалик бошпаналарга жойлаштирилган. Жаҳон банки тезкор ва барқарор тикланиш чораларини амалга ошириш иқтисодий йўқотишларни сезиларли даражада камайтиришга хизмат қилишини қайд этди.
