Сурхондарёда вояга етмаган қизни зўрлаган собиқ ИИБ ходими 15 йилга қамалди
Шунингдек, унга икки йил давомида ички ишлар органларида ишлаш тақиқи қўйилди.
Сурхондарё вилоятида қизни зўрлашда айбланган собиқ вояга етмаганлар ишлари бўйича инспектор-психологга нисбатан суд ҳукми эълон қилинди.
Аввалроқ Денов тумани Ички ишлар бўлими Жиноятчиликнинг олдини олиш бўлимининг собиқ вояга етмаганлар ишлари бўйича инспектор-психологи А.Р.га нисбатан жиноят иши қўзғатилгани ҳақида хабар берилганди.
22 июль куни Денов тумани Жиноят ишлари бўйича суди мазкур иш юзасидан ҳукм чиқарди.
Суд қарорига кўра, А.Р. Жиноят кодексининг 118-моддаси 4-қисми (ўн тўрт ёшга тўлмаган шахсни зўрлаш) ҳамда 206-моддаси 1-қисми (ҳокимият ёки мансаб ваколатини суиистеъмол қилиш) билан айбдор деб топилди.
Унга 15 йил 1 ой муддатга озодликдан маҳрум қилиш жазоси тайинланди. Шунингдек, маҳкумнинг икки йил давомида ички ишлар органларида ишлаши тақиқланди.
Суд ҳукмига кўра, А.Р. тайинланган жазони умумий тартибли колонияда ўтайди.
