Эрон АҚШ билан музокаралар ўтказилаётганини рад этди
Теҳрон ҳозирча Вашингтон билан ҳеч қандай музокара олиб бормаётганини, Уммон билан мулоқотлар эса фақат Ҳормуз бўғозидаги кемалар қатновига оид масалалар билан чекланганини маълум қилди.
Эрон Ташқи ишлар вазирлиги АҚШ билан янги музокаралар бошланганига оид баёнотларни рад этди. Вазирлик матбуот котиби Исмоил Бақоийнинг айтишича, Теҳрон ва Вашингтон ўртасида ҳеч қандай сиёсий музокаралар олиб борилмаяпти ва бундай учрашувлар кун тартибида ҳам йўқ. Бу ҳақда Reuters хабар берди.
Бақоийга кўра, айни пайтда Уммон билан олиб борилаётган мулоқотлар фақат Ҳормуз бўғозида кемалар ҳаракати хавфсизлигини вақтинча таъминлаш масаласига бағишланган. Унинг таъкидлашича, бу жараённи АҚШ билан кенг қамровли сиёсий музокаралар сифатида талқин қилиш нотўғри.
"АҚШ билан ҳеч қандай музокаралар олиб борилмаяпти. Уммон билан мулоқотлар фақат Ҳормуз бўғозига оид техник масалаларни қамраб олади", деган Исмоил Бақоий.
Эрон томони, шунингдек, ташқи ишлар вазири Аббос Ароқчи мамлакат ташқарисида диний сафарда эканини, Эрон делегациясининг эса хорижга жўнаб кетмагани ва яқин кунларда АҚШ вакиллари билан учрашув режалаштирилмаганини билдирди.
Аввалроқ АҚШ президенти Доналд Трамп Эрон билан музокаралар 3 август куни бошланишини ва ҳарбий зарбаларни вақтинча тўхтатишга қарор қилганини маълум қилган эди. Бироқ Теҳрон бу баёнотларни инкор этиб, мавжуд дипломатик алоқалар фақат Уммон воситачилигида Ҳормуз бўғозидаги денгиз қатновини тартибга солиш масалалари билан чекланаётганини таъкидлади.
