Тошкентдаги Ислом Каримов ёдгорлик мажмуаси атрофи аҳоли учун очилмоқда
Ислом Каримов номидаги илмий-маърифий ёдгорлик мажмуасига туташ 37 гектар ҳудудни комплекс ривожлантириш ишлари бошланди. Аввалроқ Саида Мирзиёева пойтахтдаги истироҳат боғларини кўздан кечирганди.
Июль ойида Президент Администрацияси раҳбари Саида Мирзиёева пойтахтдаги истироҳат боғларини кўздан кечирган эди. Ўшанда шаҳардаги боғлар ҳолати ўрганилиб, уларда аҳоли мунтазам дам олиши учун барча зарур шароитларни яратиш режалаштирилаётгани маълум қилинганди.
Бугун Тошкент шаҳридаги Ўзбекистон Республикасининг Биринчи Президенти Ислом Каримов номидаги илмий-маърифий ёдгорлик мажмуасига туташ 37 гектар майдондаги парк ҳудудини комплекс ривожлантириш ва уни аҳоли учун қулай очиқ жамоат маконига айлантириш бўйича кенг кўламли ишлар бошланди.
Маълум қилинишича, лойиҳа доирасида парк ҳудудини замонавий шаҳарсозлик талаблари ва аҳоли эҳтиёжларига мослаштириш мақсадида очиқлик ва қулайликни таъминлаш, экологик ҳолатни яхшилаш, яшил ҳудудларни кенгайтириш ҳамда замонавий инфратузилмани ривожлантириш ишлари амалга оширилади.
Қайд этилишича, мазкур ташаббуслар пойтахтдаги экологик вазиятни яхшилаш, аҳоли учун қулай шароит яратиш ҳамда марказий кўчалар ва уларга туташ ҳудудларда яшил майдонлар ва боғларни кенгайтиришга қаратилган кенг кўламли ишларнинг бир қисми ҳисобланади.
