Татаристонда ҳалок бўлган ўзбекистонликларнинг оилаларига 2 млн рублдан берилади
Жароҳатланганларга эса жароҳат даражасига қараб 300 мингдан 600 минг рублгача компенсация тўланади.
Татаристоннинг Нижнекамск шаҳрида 10 август куни содир бўлган дрон ҳужуми оқибатида ҳалок бўлганларнинг оилаларига 2 миллион рублдан бир марталик моддий ёрдам кўрсатилади. Бу ҳақда Татаристон ҳукумати матбуот хизмати маълум қилди.
Татаристон Раиси Рустам Минниханов қарорига кўра, ҳужум оқибатида ҳалок бўлган ҳар бир фуқаронинг оиласига 2 миллион рубль миқдорида компенсация тўланади.
Шунингдек, жабрланганларга тан жароҳатларининг оғирлик даражасига қараб моддий ёрдам ажратилади. Оғир ва ўртача оғир жароҳат олганларга 600 минг рубль, енгил жароҳат олганларга эса 300 минг рубль тўланади.
Бундан ташқари, ҳужум оқибатида мол-мулки зарар кўрган фуқароларга ҳам компенсация берилиши белгиланган. Муҳим мол-мулк тўлиқ йўқотилган тақдирда 156 минг рублдан ортиқ, қисман йўқотилган ҳолатларда эса 78,3 минг рубль миқдорида моддий ёрдам кўрсатилади.
Маблағлар Татаристон Вазирлар Маҳкамасининг захира жамғармаси ҳисобидан ажратилади.
Эслатиб ўтамиз, 10 август куни Нижнекамскдаги саноат ва фуқаролик объектларига дрон ҳужуми уюштирилган. Ҳодиса оқибатида 13 киши, жумладан, бир бола ҳалок бўлган, 70 дан ортиқ киши тиббий ёрдамга мурожаат қилган, 21 киши шифохонага ётқизилган. Ҳалок бўлганлар орасида Ўзбекистон ва Тожикистон фуқаролари ҳам борлиги хабар қилинган эди.
