Томди туман суди раиси лавозимига мажбуран тайинлангани ҳақидаги хабарлар рад этилди

 

Судьялар олий кенгаши Томди туман суди раиси Азиза Мирзаеванинг лавозимга гўёки мажбурий равишда тайинлангани ҳамда унинг яшаш жойидан бошқа ҳудудда фаолият юритгани ЙТҲга сабаб бўлгани ҳақидаги тарқалган хабарларга муносабат билдирди.

 

Кенгаш маълумотига кўра, ижтимоий тармоқларда марҳуманинг Томди туман суди раиси лавозимига “мажбурий розилик” асосида тайинлангани ҳақидаги тахминлар тарқалган. Қайд этилишича, бу иддаоларни тасдиқловчи ишончли далил ёки ҳуқуқий асос мавжуд эмас.

 

Азиза Мирзаева мазкур лавозим учун ўзининг ёзма аризаси ва розилиги асосида танловда иштирок этган. Судьялар олий кенгашининг 2024 йил 18 декабрдаги қарори билан у судьялик лавозимида бўлишнинг дастлабки беш йиллик муддатига Томди туман суди раиси этиб тайинланган.

 

Шунингдек, Мирзаева судьялик лавозимига тайинланган вақтда Самарқанд вилоятида у фаолият юритган судда бўш судьялик лавозими мавжуд бўлмагани маълум қилинган.

 

Кенгаш таъкидлашича, судьяларнинг бошқа ҳудудларда фаолият юритиши қонунчиликда белгиланган тартибда мавжуд бўш лавозимлар учун ўтказиладиган танлов асосида амалга оширилади.

 

Шунингдек, Азиза Мирзаеванинг лавозимга тайинланиши билан унинг 15 август куни содир бўлган йўл-транспорт ҳодисасида вафот этиши ўртасида сабабий боғлиқлик мавжудлиги ҳақида расмий хулоса йўқ.

 

Ҳодисанинг келиб чиқиш сабаблари ва бошқа ҳолатларига ҳуқуқий баҳо ваколатли органлар томонидан ўтказиладиган текширув якунларига кўра берилади.

 

Эслатиб ўтамиз, аввалроқ 15 август куни Зарафшон–Томди автомобиль йўлида Азиза Мирзаева бошқарувидаги Собалт йўл-транспорт ҳодисасига учрагани хабар қилинган эди. Автомобиль йўлдан чиқиб, ағдарилиши оқибатида судья оғир тан жароҳатлари олиб, воқеа жойида вафот этган.